የአዲስ አበባ ከተማ አስተዳደር ትራንስፖርት ባለሥልጣን የኮሮና ቫይረስ ስርጭትን ለመግታት •ትርፍ በጫኑ 276 አሽከርካሪዎች ላይ እርምጃ ወሰደ •ስለወረርሽኙ ግንዛቤ የሚያስጨብጡ ከ10 ሺ በላይ በራሪ ወረቀቶችን አሰራጭቷል •ከስድስት ሺ በላይ ተሽከርካሪዎች ላይ ስለቫይረሱ የግንዛቤ ማስጨበጫ ሰጥቷል

አዲስ አበባ:- የአዲስ አበባ ከተማ አስተዳደር ትራንስፖርት ባለሥልጣን የኮሮና ቫይረስ ስርጭትን ለመግታት ባደረገው ጥብቅ ቁጥጥር በአንድ ሳምንት ውስጥ ትርፍ ጭነው በተገኙ 276 የታክሲ አሽከርካሪዎች ላይ እርምጃ መውሰዱን ገልጿል።
በባለስልጣኑ የስምሪት ቁጥጥር ዳይሬክተር አቶ ዮሴፍ ተስፋዬ በተለይ ለአዲስ ዘመን ጋዜጣ እንደገለጹት፤ የኮሮና ቫይረስ ስርጭትን ለመግታት ከመጋቢት 7 ቀን 2012 ዓ.ም ጀምሮ በተደረገ ጥብቅ ቁጥጥር፤ የዜጎችን ደህንነት ወደጎን በማለት ያልተገባ ትርፍን ለማግበስበስ መጫን ካለባቸው የሰው ቁጥር በላይ ትርፍ ጭነው በተገኙ 276 የታክሲ አሽከርካሪዎች ላይ የአንዳንድ ሺ ብር ቅጣት በመጣል በአንድ ሳምንት ውስጥ 276 ሺ ብር ገቢ ተገኝቷል።
እንደ እርሳቸው ማብራሪያ የትራንስፖርት ዘርፉ ሰፊ ማህበራዊ ንክኪ ያለውና ለቫይረሱ ስርጭት መባዛት ድርሻው ከፍ ያለ በመሆኑ፤ ለማህበረሰቡ የግንዛቤ ማስጨበጫ ከመስጠት ባሻገር ትርፍ በሚጭኑ አሽከርካሪዎች ላይ ጠበቅ ያለ እርምጃ በመውሰድ በዘርፉ ያለውን ማህበራዊ ንክኪ በመቀነስ ማህበረሰቡ ለቫይረሱ ተጋላጭ እንዳይሆን የተለያዩ ስራዎች እየተሰሩ ይገኛል።
በዚህም የቫይረሱን ስርጭት ለመግታት ለአሽከርካሪዎች መስኮት መከፈት እንዳለበት፣ ያልታጠቡ መጋረጃዎችን ማውረድ እንደሚገባቸው፣ የተበየዱ መስኮቶችን በአስቸኳይ አሰርተው በቀላሉ የሚከፈቱና የሚዘጉ እንዲሆኑ እንዲያደርጉና ከመቼውም ጊዜ በተለየ በትራንስፖርቱ ዘርፉ ያለውን ከፍተኛ ማህበራዊ ንክኪ ለመቀነስ ትርፍ በሚጭኑ አሽከርካሪዎች ላይ ጥብቅ እርምጃ እንደሚወሰድ ሰፊ የግንዛቤ ማስጨበጫ ትምህርት ተሰጥቷል።
በመሆኑም በአስሩም ቅርንጫፍ ጽህፈት ቤቶች ከፌርማታ ውጭ ድንገተኛና መደበኛ ቁጥጥርና ፍተሻ የተደረገ ሲሆን፤ የዜጎችን ደህንነት ወደጎን በማለት ያልተገባ ትርፍን ለማግበስበስ የሚንቀሳቀሱት ላይም የገንዘብ ቅጣት በመጣል ላይ መሆኑን አብራርተዋል።
በአንድ ሳምንት ውስጥ በ 6 ሺ 587 ተሽከርካሪዎች ላይ ለ79 ሺ 688 አሽከርካሪዎችና ተሳፋሪዎች በተለያዩ ፌርማታዎቹ የግንዛቤ ማስጨበጫ ትምህርት መሰጠቱን ጠቁመው፤ የትራፊክ ፖሊስ፣ የእሳትና ድንገተኛ አደጋዎች መከላከልና መቆጣጠር ተሽከርካሪዎችን በመጠቀም በታክሲና በአውቶብስ ፌርማታዎች እንዲሁም ሰው በብዛትና በሚሰበሰብባቸው አደባባዮች ላይ ስለቫይረሱ ሰፊ የግንዛቤ ማስጨበጫ ትምህርት ተሰጥቷል ብለዋል።
በዚህም በአንድ ሳምንት ውስጥ ከሶስት ነጥብ አንድ ሚሊዮን በላይ ለሚሆን ህዝብ የግንዛቤ ማስጨበጫ ትምህርት መሰጠቱን የተናገሩት ዳይሬክተሩ፤ በተጨማሪም ማህበረሰቡ ስለ ወረርሽኙ ያለውን ግንዛቤ በማስፋት እራሱን እንዴት መከላከል እንዳለበት ግንዛቤ ለሚያስጨብጥ 10 ሺ 290 በራሪ ወረቀቶችን መሰራጨቱን ገልጸዋል።
አቶ ዮሴፍ ከብዙኋን ትራንስፖርት ሰጪ ድርጅቶች አመራሮች ጋር በአስሩም ቅርንጫፍ ጽህፈት ቤቶች ውይይት የተደረገ ሲሆን፤ በዚህም የብዙኋን ትራንስፖርት ሰጭ ድርጅቶች ማህበራዊ ንክኪን በመቀነስ የቫይረሱን ስርጭት ለመግታት ከወንበር በላይ እንዳይጭኑ አመራሮቹ አቅጣጫ መስጠታቸውን አውስተዋል።
አንዳንድ የአንበሳና የሸገር የከተማ አውቶቡስ አሽከርካሪዎች በቸልተኝነት ከወንበር በላይ ትርፍ እንደሚጭኑ ዳይሬክተሩ ጠቁመው፤ ትርፍ ጭነው ለተገኙ አሽከርካሪዎች የግንዛቤ ማስጨበጫ ከመስጠት ባለፈ ማስጠንቀቂያ እየተሰጠ ነው፤ በቀጣይ ከስህተታቸው የማይታረሙ ከሆነ የተሽከርካሪውን የሰሌዳና የጎን ቁጥር በመመዝገብ ባለስልጣኑ በግል ደረጃ እርምጃ እንደሚወስድባቸው አሳስበዋል።
አዲስ ዘመን መጋቢት 16 /2012

ሶሎሞን በየነ