ፍርድ ቤቱ እንግልት የሚያስቀር የውሳኔ ግልባጭ አሰጣጥ መዘርጋቱን አስታወቀ

አዲስ አበባ፡- የፌዴራል ጠቅላይ ፍርድ ቤት በውሳኔ ግልባጭ አሰጣጥ ደንበኞቹ በቀጠሮ በመመላለስ ይደርስባቸው የነበረውን እንግልት የሚያስቀር አሰራር መጀመሩን ገለጸ።

በፍርድ ቤቱ የኮሙኒኬሽን ጉዳዮች ዳይሬክተር አቶ ሰለሞን እጅጉ፤ ለአዲስ ዘመን ጋዜጣ እንደገለጹት ባለፉት ጊዜያት ፍርድ ቤቱ ውሳኔ ካሳለፈ በኋላ በሬጅስትራር በኩል የውሳኔ ግልባጭ ለመውሰድ ከሁለት ቀናት እስከ ሳምንታት ይወስድ ነበር።

አንዳንድ ጊዜ በተሰጠው የቀጠሮ ጊዜ ሳይደርስ ሲቀር ሌላ ቀጠሮ በመስጠት ከክልሎች የሚመጡ ደንበኞች ሁለትና ሶስት ጊዜ በመምጣት የውሳኔ ግልባጭ ለመውሰድ ይንገላቱ ነበር። አሁን በተጀመረው አሰራር ውሳኔው እንደተወሰነ ከአምስት እስከ አስር ደቂቃ የውሳኔ ግልባጩ የሚሰጥ አሰራር መጀመሩን አመልክተዋል።

የተጀመረው አሰራር አገልግሎቱን ከማቀላ ጠፉም በላይ በፍርድ ቤቱ የውሳኔ ግልባጭ ይፈጠር የነበረውን ብልሹ አሰራር ያስቀራል። በተለይም ከክልል የሚመጡ ደንበኞች የውሳኔ ግልባጭ አሰጣጡ ሁለትና ሶስት ጊዜ ያመላልሳቸውና ለከፍተኛ እንግልት ይዳርጋቸው የነበረ ሲሆን አሁን ላይ የውሳኔ ግልባጩን ወዲያውን ይዘው በመሄድ እፎይታ እንደሚፈጥርላቸውም ተናግረዋል። አገልግሎቱ ከየካቲት 24 ቀን 2012 ዓ.ም በአንድ ችሎት መጀመሩንና በቀጣይ በሌሎች ችሎቶችና ፍርድ ቤቶች እንደሚቀጥል ጠቁመዋል።

 ቀደም ሲል ዳኞች በእጃቸው የጻፉትን በጸሐፊዎች ወደ ኮምፒዩተር እንዲጻፍ ቀጠሮ በመስጠት የውሳኔ ግልባጩ ይዘጋጅ እንደነበረ ያነሱት አቶ ሰለሞን፤ አሁን ግን ዳኞች በኮምፒዩተር በመጻፍ ውሳኔ ከሰጡ በኋላ የውሳኔውን ሀሳብ በማተምና አስፈላጊ፣ ማህተም፣ ክፍያና ሌሎች ሁኔታዎችን ከአምስት እስከ አስር ደቂቃ ውስጥ በሟሟላት የውሳኔ ግልባጩ ወዲያው እንዲሰጣቸው ማድረግ ተጀምሯል ብለዋል።

አዲሱ አሰራር ተግባራዊ ለማድረግ በተለያየ ጊዜ ዳኞች በኮምፒዩተር የመጻፍ ችሎታ እንዲያሳድጉ ከተሰጠ ስልጠና ባለፈ ቀደም ሲል ዳኞች የእራሳቸው ላፕቶፕ ስለነበራቸው ተጨማሪ ሀብት አለማስፈልጉንም አንስተዋል።

ወደ ሥራው የተገባው ዳኞች ውሳኔዎቻቸውን ጽፈው ማቅረብ እንደሚችሉና በማረጋገጣቸው መሆኑም ገልጸዋል። ከዳኞች ማረጋገጫ በተጨማሪ የፕሬዚዳንት ጽሕፈት ቤት ኃላፊነት በመውሰድ ሌሎች አሰራሮችን በማቀናጀትና በሟሟላት ስራው እንዲጀመር ማድረጉም ጠቁመዋል።

ተገልጋዮች ፍርድ ቤቱ የውሳኔ ግልባጩን ወደዚያው መስጠት በመጀመሩ መደሰታቸውንና አሰራሩ በሥር ፍርድ ቤቶችና በክልሎች ፍርድ ቤቶች ጭምር እንዲሰፋ ሀሳብ ሰጥተዋል። ከብልሹ አሰራርና ከእንግልት እንደሚያድናቸውም መናገራቸውን ዳይሬክተሩ አመልክተዋል።

በፍርድ ቤቱ የአንደኛ ሰበር ችሎት ጸሐፊ ወይዘሮ አበባ ሞገስ፤ አዲስ የተጀመረው ለባለሙያውና ለደንበኞች አሰራሩ ቀልጣፋ አድርጎታል። የውሳኔ ግልባጭ ለማግኘት በቀጠሮ ይንገላቱ የነበሩ ደንበኞች በአምስት ደቂቃ ግልባጩን በማግኘት እረፍት ሰጥቷል። ደንበኞች በአሰራሩ መደሰታቸውንና አሰራሩ ወደ ከፍተኛና የመጀመሪያ ደረጃ እንዲወርድም አስተያየት መስጠታቸውንም አመልክተዋል።

በፍርድ ቤቱ ጸሐፊ የሆነቸው ወይዘሪት ፋሲካ ዘውዱ በበኩሏ አሰራሩ መልካም ነገሮች ቢኖሩትም የሚሰጠው የውሳኔ ግልባጭ አንዳንድ በመሆኑ በርካታ ግልባጭ ለሚፈልጉ ያስቸግራል። ከዚህም በተጨማሪ ለሰራተኞቹ የስራ አካካባቢ ምቹ ባለመሆኑ መስተካከል እንዳለበትም ትናግራለች።

ፍርድ ቤቶች የዳኝነት አገልግሎትን በኢንፎርሜሽን ቴክኖሎጂ ለማገዝ እንደ ኢ-ፍይሊንግ አይነት አሰራሮች በመጀመር በክልል ፍርድ ቤቶች አማካኝነት መዝገብ የመከፍትና በቪዲዮ ኮንፈረንስ ንግግር በማድረግ አሰራሩን ለማዘመን ጅምር ስራዎች ቢኖሩም ይበልጥ ለማዘመን ጥረት ይጠይቃል ብለዋል ዳይሬክተሩ።

በተጨማሪም የአሰራር መመሪያና መመሪያ መዘርጋትና ቴክኖሎጂውን ማበልጸግ ያስፈልጋል። ለዚህም ከፍተኛ ገንዘብ ይጠይቃል። ነገር ግን ይህን ለማድረግ የሚያስችል የገንዘብ አቅም ፍርድ ቤቱ እንደሌለው ያስረዳሉ።

አዲስ ዘመን የካቲት 30/2012

አጎናፍር ገዛኸኝ