Maraammartoo jedha hawaasti. Yoo wanti tokko achi siquu didee bakkuma duraatti deebi’e. Daa’imtillee maraammartoo taphatti. Tapha giingoo naanna’anii bakka ka’anitti deebi’uu. Naanna’anii… naanna’anii… naanna’anii ifaajii hedduu booda bakkuma ka’anitti deebi’uu.
Akka biyyaatti maraammartoo keessa akka jiru natti dhagahama. Akka sabaattis maraammartoo keessaa bahuun waan dadhabame fakkaata. Kan nama dhuunfaas kanuma. Kan kalee walumaan balaaleffanneefi abaarre har’a deebi’ee raawwatama. Kan dheengadda balaaleffanne deebi’ee dhufa.
Kun gama hundaan jira. Kan har’a balaaleffannuufi abaarru bori hindeebi’u jechuuf waan ittiin mirkaneeffannu hinqabnu. Maalumaafuu ajjeechaa namoota qulqulluu ciminaan nan balaaleffadha. Waaqayyo maraammartoo kana keessaa nu haabaasu, Waaqayyo nagaasaa nuuf haa buusu jedhee dhaammadheen gara dubbii ijoo koo kan haraatti darba.
Imalli yaada koo kan torbee kanaa gara Mana Maree Bakka bu’ootaa ummataa isin geessa. Gabaabumatti Paarlaamaa jechuu kooti.
Torbee kana paarlaamaan taa’ee ture. Ajandaa guddaa tokko ilaaluufi irratti mari’achiisuufi mari’achuuf. Ajandicha gabaasa odiitara muummichaati. Gabaasti kun akkuma addunyaattuu gabaasa ijoodha. Kan mootummaan gurra kennuufi. Kan hojmaata ittiin sirreeffatu. Kan bajati qabame seeraan hojiirra ooluufi dhiisuu ittiin mirkaneeffatu. Kan labsiiwwan hojii faayinaansiitiin walqabatan akkaataa labsamaniin hojiirra ooluusaanii ittiin adda baafatu.
Miidiyaaleen marii paarlaamaa kana sirriitti gabaasaniiru. Anis miidiyaaleerratti sirriitti ilaalaan ture. Gaaftokkommoo keessa taa’ee dhaggeeffachuun danda’a ta’a. Maaltu beeka?
Odiitarri olaantuun, Aadde Masarat Daamxee, xibabii bareeda uffattee afyaa’ii maddii miidhagdee teesse. Kabajamoo Obbo Kiristaan Taaddalaa, walitti qabaan koree dhimma bulchiinsa baasiilee mootummaafi to’annoo, maddii biraatiin taa’aniiru. Afyaa’iin jidduu jiru. Aadde Masaratitti aanee namoonni lama taa’aniiru. Teessoonsaanii ni bareeda. Akkuma aangoosaanii.
Kabajamoo afyaa’iin fuulasaanii dheeraafi sodaachisaa sana asiifi achi garagalchanii mana to’achaa turan. Waa akka shakkan namaaf gala. Osoo Obbo Kiristaan gaafa sana afyaaii ta’anii paarlaamichi akkamitti oola jedheen qalbiin yaade. Erga waci xiqqoon uumamee booda paarlaamichi qalbiitti deebi’e. Gabaastis bal’inaan dhihaate. Teessoo gartokkeen qullaa ta’ullee warri argaman gabaasicha dhaggeeffatan.
Waggoota 12 taraniif Muummichi Odiitara Olaanaa Federaalaa nama Gammachuu Dubbisoo jedhamu ture. Nama kana hanga tokko nan beeka. Nama ijjannoo cimaa, beekumsaafi dandeettiidhaan deeggarame qabuudha. “Gammachuu bira wanti sodaa jedhamu hinjiru” jedhu warri ana caala itti siqanii beekan. Hojiisaa malee namaaf hinjilbeeffatu jedhama. Namni kun Mallas Zeenaawii isa sodaatamu sana fuuldura taa’ee kaabinootiifi jaleewwan kaabinootaasaa haala seera faayinaansii itti cabsan itti himaa ture. Kanaan hanga miidiyaarratti jechi hintaane itti dubbatamu gahuusaa nan beeka. Gammachuun garuu sodaadhaan hojiisaa hindhaabne. Kabajaan hojjatee kabajaan gaggeeffame.
Aadde Masarat nama Obbo Gammachuu jala turte natti fakkaata. Haalli gabaasa itti diheessite miidhagaadha. Waan hojjattootashii waliin waggaa guutuu itti dhama’aa turan ifatti ibsiteetti. Akkuma Obbo Gammachuu, sodaa tokko malee gabaasicha dhiheessite. Gaaffiin jiru eenyutu dhaggeeffateef kan jedhuudha.
Oduu gabaasa kana televisiyoona “FBC’ irraan daaw’adhe. Gaazexeessichi akka oduutti waan dabarsuu qabu dabarseera. Oduu darburra kan xiyyeeffannoo koo harkise viidiyoo waraabameedha. Jechoota oduun dubbifamanirraa viidiyoon sun dhimmicha sirriitti ibse. Ijji koo teessoo paarlaamaa bitaa hanga mirgaatti daaw’atte. Isa bira taree bakka keessummooti afeeraman garuu kan miseensa paarlaamaa hintaane ilaaluuf yaale. Waan ajaa’ibaati. Teessoon hedduun duwwaadha.
Gaaffii miseensoti paarlaamaa biyya keenyaa meeqa jedhutu qalbiitti na dhufe. Heera gadi baaseen dubbise. Teessoo 550 hincaalle jedha. Keeyyata 54 irratti. Kan amma jiru naannoo Tigray dabalatee teessowwan 547 akka ta’en odeeffadhe. Guyyaa gabaasti kun dhiyaatu miseensa meeqatu argame laata jedheen of gaafadhe. Osoon amantaa afyaairraa qabaachuu baadhee koramiin hinguutne jedheen morma. Isaan garuu osoo koramiin hinguutin waltajjicha akka hingaggeessine nan beeka. Warri achii ‘qawuxii’ uumuuf yaalanis hindabarsan. Boodarra bakka bu’ooti naannoo Tigraayi akka hinjirre hubadhe. Isaan teessoo 38 qofa waan qabaniif teessoon qullaan haganaa ji raachuu hin malu jedheen of amansiise.
Karaa kamiinuu miseensoti gahaan waltajjii kanarratti hinargamne. Warri dhimmi ilaallatus irraa hafaniiru. Raawwachiistoti guguddaafi xixiqqoon. Kanammoo walitti qabaan korichaas dubbataa turan.
Akka hubannaa kootti gabaasti dhihaate waan hedduu kan ofkeessatti hammateedha. Maraammartoo ittifayyadama bajataa yunivarsiitota keenya keessa ture kan bara Obba Gammachuurraa jalqabee turellee kan mul’iseedha.
Xiqqoodhuma fakkeenya haa kaasuu. Akka gabaasti dhiyaate mul’isutti manneen hojii federaalawaa 171 irratti hojiin odiitii gaggeeffameera. Manneen hojii kanneenirratti hir’inni mul’ate biyya hiyyeettii tana keessatti wanta nama naasisuudha. Manneen hojii seeraafi sirna kabajanii kanneen hojjatan meeqa ta’u? gaaffii jedhu namatti kaasisa.
Ragaadhan haa ilaallu. Yunivarsiitii Gaambeellaafi Dabra Birihaanirratti qarshii miliyoonni 1.5 ol hir’inni mulateera. Tokko jedhaa. Yunivarsiitiiwwan Hawaasaa, Miizaan Teeppiifi Qabrii Dahaarirratti qarshii miliyoonni tokkoo ol seera malee baheera. Lama. Manneen hojii maallaqa gara kaazinaa mootummaatti galchuu qaban osoo hingalchin hafuusaatiin qarshiin miliyoona 87.9 seeraan ala qabameera. Sadii. Maallaqni guddaan osoo herreegnisaa walirraa hinbu’in kan gara qarshii biliyoona 13 ol ta’u akka jirullee gabaasti kun ni mul’isa. Afur. Kaanis ittifufuu dandeessu. Gabaastichi dheeraadha waan ta’eef.
Kan yuunivarsiitotaa ajaa’iba. Mi’eessituuwwan gabaasaa odiitaraati jechuun ni danda’ama. Kun bara dheeraaf kan tureedha. Maqaan yunivarsiitotaa haala kanaan dhahamuun amaanaa ummati biratti qaban guddaa gadi buusa. Yunivarsiitoti seeraafi foormulaa barsiisaasaa oolu. Bulchiinsa gaarii barsiisu. Seeraafi foormulaa sana isaan barsiisan isaanirratti hinhojjatuu? Gaaffii hawaasa keessatti ka’uudha.
Gabaasti odiitara muummichaa sirnaafi seera qabaachuu hojii mootummaa federaalawaa keessattuu baasiifi galii wajjin walqabatee murteessaadha. Labsiiwwan paarlaamaan kun baasu hojiirra oluunsaa karaan itti mirkanaa’u keessaa gabaasti odiitaraa isa tokkoodha. Bajatni paarlaamaan kun ramadu qisaasamuufi dhiisuusaa kan mirkaneessu paarlaamaa kana. Hojmaata manneen hojii jiran qabsiisuufi dhiisuu keessattis qaamni odiitii gahee guddaa qaba.
Miseensota paarlaamaatiif gabaasti kun galtee gaariidha. Qamolee hojii raawwachiistotaaf keessattuu miseensota kaabinee hojii damee dameesaanii hooggananiif duubdeebii guddaadha. Garuu, qaamoti irratti argamuuf malan gahinaan irratti hin argamne.
Dimshaashumatti. Dhimmichi dhimma xiyyeeffannoo guddaa barbaaduudha. Abbaan hojichaa tokko, lama jedhee gabaaseera. Seerriifi sirni paarlaamaan raggaasise cabe jechaa jira. Kana sirreessuun qooda eenyuu ta’a? kan mootummaa.
Mootummaa jechuunimmoo qaama sadeeni. Qaama seera baasu, qaama seera raawwachiisu, qaama seera hiiku. Qaamni sadeen kun keessattuu qaamni hojii raawwachiistuu yoo dhagahuu baate eenyutu dhagaha? Yoo kan dhaggeeffatuufi hojii sirreessu hin jiraanne gabasti keenyas maraammartoo ta’a. Bara baraan achumatti, isumatti deebi’uu.
Torban gaarii!
BARIISAA Waxabajjii 18 / 2014
