“Akka durii konkolaataafi qarshii mootummaatiin duula nafiladha gaggeessuun hinjiru” -Obbo Awwaluu Abdii

Finfinnee: Paartichi filannoo bara dhufuutiif kaadhimamtoota ciccimoo qopheessaa jiraachuusaafi galii miseensotasaarraa argatus dabaluuf karoorfachuusaa ODPn beeksise.

Paarticha faayinaansiin cimsuuf bara bajataa xumurametti qarshii miiliyoona dhibba 199 ta’u miseensotarraa funaanuu kan himan Waajjira ODPtti ittigaafatamaan ijaarsa siyaasa baadiyyaa, Obbo Awaluu Abdii, bara haaraatti immoo qarshii biiliyoona tokkoo ol ta’u miseensotarraa sassaabuuf karoorfamuu ibsu.

Waantota filannoo bara 2012 gaggeeffamu adda taasisan keessaa tokko akka dura baratametti bajataafi konkolaataa mootummaatti fayyadamanii duula nafiladhaa gaggeessuun hafuusaati kan jedhan Obbo Awwaluun, kana hubachuun paartichi galii miseensotarraa argatu dabaluuf hojjachaa jiraachuu himu.

Bara haaraatti miseensota haaraa kuma 800 ta’an horachuuf karoorfamuusaafi  kun immoo sochii galii paartichaa guddisuuf taasifamu kan deeggaru ta’uu dubbatu.

Baay’ina miseensotaa qofarratti osoo hintaane, miseensota ciccimoofi kaayyoof amanamoo ta’anirratti xiyyeeffatamuusaafi filannoo ittaanuufis bu’uuruma kanaan qophiin taasifamaa jiraachuu eeru.

ODPn yeroo ammaa miseensota miiliyoona 2.5 akka qabu ragaaleen ni mul’isu.

Bayyanaa Ibraahimiin

Gaazexaa Bariisaa Qaam’ee 2/2011