Finfinnee: Waldaan Kiristaanaa Warra Wangeelaa Makaana Yesuus Itoophiyaa waamicha araaraa Pirezdaantiin Bulchiinsa Mootummaa Naannoo Oromiyaa qaama hidhatee bosona keessa socho’aa jiruuf taasisan kan deeggartu ta’uu beeksiste.
Pirezdaantin waldittii Lubni Doktar Yoonaas Yiggazuu ibsa kaleessa miidiyaaf kennaniin akka jedhanitti, Itoophiyaan waggoota dhiyoo asitti waldhabdeefi walitti bu’iinsa bakkawwan garagaraatti ishee mudaterraa kan ka’e rakkoo guddaa keessa bu’uurra darbee miidhaa namoomaa, qabeenyaafi hawaasummaa hamaa keessa buutee turuu yaadachiisaniru.
Rakkoo walitti bu’iinsaa uumamaa ture ilaalchisees walitti bu’iinsichi waliin dubbachuufi mariidhaan furmaata akka argatu waldittiin kadhachaa, akkasumas waamicha araaraa qaamota dhimmi ilaallatu hundaaf gochaa turuu himaniiru.
Walwaraansa dhaabuuf waamicha Pirezdaantin Bulchiinsa Mootummaa Naannoo Oromiyaa Obbo Shimallis Abdiisaa taasisaniif waldaansaanii deeggarsa guddaa akka gootu ibsuun Lubni Doktar Yoonas, walwaraansa taasifamaa jiru kanaan Oromiyaatti hawaasni dararama, dhumaatii lubbuu, qe’eefi qabeenya isaarraa buqqa’uun ala qabeenyi mootummaafi namoota dhuunfaa barbadaa’aa jiraachuu hubachiisaniiru.
Rakkoo ammaan tana Oromiyaa keessa jiru hiikuun kan danda’amu garaagarummaa moggaatti dhiisanii akkuma kan Itoophiyaa Kaabaa marii qofi furmaata ta’uu eeranii, waamicha araaraa mootummaan taasises dinqisiifataniiru.
Milkaa’ina waamicha araaraa kanaafis waldaansaanii kallattiidhaan qooda fudhachuuf ykn deeggarsa barbaachisu hunda gochuuf qophii ta’uushee Luba Doktar Yoonaas ibsaniiru.
Taammiruu Raggaasaatiin
BARIISAA SANBATAA Guraandhala 18 Bara 2015
4 Comments to “ Waldittiin waamicha araaraa taasifame akka deeggartu ibsite”