– Sababa weerara koronaatiin addababa’irratti hinkabajamu
Finfinnee: Ayyaanni bara haaraa Siidaamaa Fiichee Cambaalaalaa kaleessarraa eegalee kabajamaa jira. Ayyaanni baranaa sababa weerara Koviid-19n addababa’irratti akka hinkabajamne Pirezdaantiin Naannoo Sidaamaa Obbo Dastaa Leedaamoo ibsa baga geessanii ayyaanicha dura kennaniin ibsaniiru.
Ummannis wayita ayyaanicha kabaju hawaasa gargaaruufi waliiwaliisaa waldeggaruun ta’uu akka qabu eeranii, duudhaan ayyaanichaa namaaf qofa osoo hintaanee beladootaafillee kabaja kan kennuu ta’uu kaasu.
“Ayyaanichaaf jecha beeladoonni kan itti hinqalamneefi bakki bultiisaanii kunuunsuun kan ayyaaneeffatamu akkasumas, mukni kan itti hinmuramneedha” jedhu.
Wayita ammaa sababa weerara koviid-19 akka addunyaatti babal’achaa jiruurraa ka’uun ayyaanni Fiichee Caambalaalaa akka duritti hinkabajamu kan jedhan Obbo Dastaan, ta’us ayyaanichi duudhaasaa osoo hingadhiisiin dhalataan sabichaa hundi manasaa taa’ee akka kabaju ibsusaanii TOIn gabaaseera.
Jijjiirraa baraa Sidaamaa kan ta’e Fiichee Cambalaalaa hambaalee kiliyaa Yuneeskootti galmaa’an keessaa isa tokko.
