“Yeroon yeroo waa’ee jaalalaa, nagaafi tokkummaa itti labsaniidha” -Artisti Alii Shabboo

Keessummaan keenya har’aa Weellisaa  Doktara Kabajaa Artisti Alii Shabboo. Aliin abbaasaa  Obbo Shabboo Waddoofi harmeessaa Aadde  Hamidaa Mawludirraa ALA bara 1942 Dirre Dhawaatti dhalate. Artistiin kun keessumaa sirbasaa “Dinbushee Galaa” jedhamuun caalaatti ummata biratti beekama.

Artistoota Oromoo keessaa yeroo jalqabaatiif meeshaa muziqaa gitaaraan taphachuu kan eegale artisti Aliidha. Artistiin maanguddoo waggaa 77 kun dhiyeenya kana Yunivarsitii Haramaayaarraa doktoreetii kabajaa argateera.

Wellisaa beekamaan kun yeroo Afaan Oromootiin dubbachuufi sirbuun hin yaadamnetti  guddina afaaniifi aadaa Oromootiif nama qabsoo cimaa taasiseefi aarsaa guddaa kaffaleedha. Nutis gaafdeebii dhiyeenya kana magaalaa Jigjigaatti artisticha wajjin taasifne akka armaan gadiitti dhiyeessineerra.

Bariisaa: Bakka dhalootaafi haala barnootaa keessanii gabaabaatti nuuf ibsaamee.

Artisti Alii: Magaalaa Dirre Dhawaattin dhaladhee guddadhe. Mana barumsaa sadarkaa tokkoffaafi lammaffaa bakkuma dhalootaa kiyyattin baradhe. Akkuman barumsaa sadarkaa lammaffaa xumureenan sirbaatti seene. Haatiifi abbaan kiyya erga narraa du’anii booda hawwisoo Arfan Qal’oottan seene.

Bariisaa: Hawwisoo Arfan Qal’ootti akkamiin seentan?

Artisti Alii: Namni Ismaa’eel Mahaammad jedhamuufi tapha aadaafi muuziqaa Oromootiin beekamu tokkotu ture. Namni kun sirba aadaa Oromoo, Shaggooyyee jedhamus ni taphata. Akkasumas sirba cidhaa aadaa Oromoo weellisaa ture. Anis isuma fakkeenya godhadheen sirbatti seene; Hawwisoo Arfan Qalloottis makame. Yeroon sirba jalqabetti waanin walaloo hinqabneef maqaa abbaa kiyyaatiin akkas jedhee sirbuu jalqabe.

Ana Alii Shabboo, Shabboo Waddoo Umar

Umar Saalii Baroo, Baroo Burqaa irraa

Hidda lafaa qonnee dadad…jechuun.

Aniifi Ismaa’eel akka walaloo sirbaa barbaannu Abubakar Muusaa (Abbaa Walaloo)tti himne. Innis walaloo sirbaa qopheessee nuu kenne. Ismaa’eel walaloo Abubakar yeedaloodhaan miidhagsee sirbasaa jalqabaa kan akkas jedhu baase.

Ija lameen kuulaa, yaa ililii birraa

Osoo naan haasoftee sii wajjinin oolaa

Bareedduu hundarraa eessumatti  walgarraa

Silaa walagarree barrisuu barraa.

Bara 1962  yeroo haati warraa Hayilasillaasee duute utuu ummatni gaddarra jiruu Abubakar ammas walaloo sirbaa nuu qopheessee weellisa ittifufne.

Walaloo waan hinqabneef sirboota Hindiifi Sudaan dhaggeeffannee yeedaloosaa gara Afaan Oromootti jijjiiruudhaanis taphanneerra. Otuma kun kanaan jiruu ijoollee Arfan Qalloofi dargaggoota wajjin qabsoo Oromoo keessattis hirmaachuu jalqabne.

Bariisaa:  Sirbi yeroo jalqabaatiif sagalee ittiin qarattan kami? Sirboota akkamiis weellisaa turtan?

Artisti Alii:  Sirba ‘’Asheeta Shumburaa, Ija Lameen Kuulaa’’ kan jedhamuunin sagalee qaradhe. Yeroo sana sirba kamiifuu yeedaloo anaafi Ismaa’eeltu baasaa ture. Sirboonni keenyas haala kanaan Hawwisoo Arfan Qalloo keessatti beekamaa ture. Sirboonni keenya yeroo sanaa harki caalu sirboota siyaasaa turan. kanaafis dhiibbaawwan adda addaa nurra gahaniiru.

Bariisaa: Walaloo yeedaloo sirba Sudaanirraa gara Afaan Oromootti weellistaniin keessaa nuu eeraa mee?

Artisti Alii: “Way atii way atii

Tanin jaalle atii

Eessaa baatee atii

Bareeda kee atii

Way maalii gayaa

Hayaatii hayaatii

Ahubbukii antii

 Ahubbukii antii

Kahubbi lidaatii

Maa anil hayaat

Yaa ta mormin alaabaa

Sii jaallee sin dhaabaa

Si hin jibbuu, hin jibbuu hin jibbuu

Si hin jaallee akkan je’uu

Naa’aanu sa’aadaa ahbaabaa

Wa naahanulmawaadaa kullaabaa

Addub addub addubi

Si hin jibbuu, hin jibbuu hin jibbuu

Ishaa’allaah kariim

Wajjii gallaa je’ii” kan jedhuudha

Bariisaa: Kaaseettii sirba keessan jalqabaa yoom baaftan? Sirba kamiinis beekamtan?

Artisti Alii: Kaaseettii sirba kiyya jalqabaa bara mootummaa Dargiin baase. Isas Buufata Raadiyoo Harar geessee akka beekamu taasise. Kaaseettiin kiyya jalqabaa sirba:

“Qotee bulaa ammas qotee bulaa

Inni cunqurfame hundi waliigalaa

Dhugaan mirqaanfadhaa ka’aa hirribarraa

Diina tumsaa keessan ilaalaa addaan baraa

Hadhaawaa boora’aa yeroof haafakkaatuu

Dhugaan booda garuu bakkasaa hinhanqatuu

Cabanii baqanii tattaafatan malee

Haqa bilisummaa argachuun hinmallee” jedhamuuni.

Bariisaa: Sirboota meeqa qabdu?

Artisti Alii: Wallaahi! Ani lakkoofsa sirboota kiyyaa hinbeeku. Sirbi ani dhuma kana irra baase garuu akkas jedha.

“Maaliif bilisoomtiif Oromiyaa jibbanii

Qabeenyuma keenyaan kan keenya jedhanii

Jaarraa tokko guutuu sobaan jiraatanii

Aayyoo tee magartuu, abbaa keetis jagnaa

Utuu jagni jiruu gad hinjedhin diinaaf” kan jedhuudha.

Dhiiraafi shamarree walfuudhanii sireerratti walqaaneffatan ilaalchisuudhaan sirba akkana jedhus baaseera.

“Hiree walitti nu fidee

Qooda jireenyaa addaan filachuuf

Ilmaan horree bultii ijaarrachuuf

Gammannee dabarsuuf wajjin waarinsaa

Bultii qabanii taa’uun gammachuu dur hinqabnee

Kabaja mataa ofii qabanii taa’uun bultii murteessinee

Waallee ni dabartii kanaafuu bultiin mana ta’uu hubannee

Kanaafuu bultiin mana koo malee jiruun jiruun naaf hinmi’oofnee”.

Sirbi kun warri walfuudhan lamaan akka walhinqaaneffanne gochuudhaan sodaafi qaanii gidduusaanii jiru balleessa.  Hawwisoowwan Oromiyaa hunda keessatti hirmaachaan ture. Ani wallee muuziqaa nan facaase malee maallaqa tokkoyyuu irraa hinarganne.

Bariisaa: Walaloo eenyufaatu isinii kennaa ture?

Artisti Alii: Maammad Qophees walaloo sirbaa baay’ee naa kenneera. Qarshii tokkollee narraa hinbarbaadu. Ani isaan baay’een boona innis anaan ni boona.

Bariisaa: Yoom, akkamitti biyyaa baatan?

Artisti Alii: Yeroo ABOn biyyaa ba’en anis karaa Jibuutii ba’e. Oromoon Jibuutii jirus haala gaariidhaan nasimate. Hawwisoon ABO, Caffee Gadaas Jibuutii ture. Anis hawwisicha waliinan ture. Yeroo sana waltajjii muuziqaa guyyaa tokkootiin hanga qarshii miliyoona sadii walitti qabaa turre. Waltajjicharratti sirba akkas jedhun sirbaa ture. Jibuutii keessatti rakkoo guddaan dabarse.

“Biyya bilisoomsuuf WBO ta’ee lolee

Sirni walabummaa ta’uu badullee

Oggaan bobbaa galuu dirree lolaa oolee

Darbee darbee isin yaaduun koo hinoollee

Ilmaan kiyya lameen, Boontuuf Magarsaa

Jabaadhaa jabeessaa barnootarratisaa

Seenaa Oromoodhaa hundumaa agarsiisaa”. Eddiin Jibuutii waggoota 10f turee booda gara Awustiraaliyaatti qajeele.

Bariisaa: Weellisummaa maddiitti hojii biraa hinyaallee?

Artisti Alii: Yaaleera malee. Fakkeenyaaf yeroo jalqabaatiif Afaan Oromootiin beeksisa biiznasii natu hojjete. Kanaanis kaampaanota qoricha aspiriinii, pilipsii, Warshaa Sukkaaraa Wanjiitiif omishasaanii beeksiseera. Walaloon ittiin beeksisaa ture keessaa kan ittaanu ni eerama.

“Tolfamaa filamaa

Jaalatamaa namaa

Philipsii raadiyoo

Gaarii waliif himaa,

Gaarii waliif himaa

Philipsii raadiyoo Galgalaa ganamaa

Barbaaddanii hin dhabdan bakkayyuu argamaa

Philipsii dhagaa baatirii

Hundarraa beekkamee

Hammaatee hin laafatu

Sibiilaan tolfamee

Sibiilaan tolfame

Aspiroon dawaan isaa jabaa

Aspiroon bishaaniin liqimsi

Aspiroon fayyisaa dhukkubaa

Oo.. yoo mataan si dhukkubee

Dufkakaafi laydaa

Ohoo ohoo ohoo dafee si dhaqqabaa

Aspiroon aspiroon aspiroon

Wanjii sukkaar wanjii

Bunaafi hojjaa wajjiin jabeenna sii kennaa

Kuruph jedhii kuruph jedhii wanjii

Dastaa karameellaa

Karameellaa hundaa caalaa

Laalaa gaa biyya teenyaa

Alla waa mi’eenyaa

Haa bitannuu maaliif teenya

Dastaa karameellaa

Akkam bareedaa, bareeda sirraa

Hidhadhu sa’aa Ooris harkarraa

Akkam bareedaa, bareeda sirraa

Hidhadhu sa’aa Ooris harkarraa”

Bariisaa: Dhimmoota hawaasummaa biroorratti hoo hinweellisnee?

Artisti Alii: Weelliseeera malee. Keessumaa dhimmoota hawaasummaafi siyaasaan walqabatanirratti weelliseera. Walaloon kunis kanuma keessatti kan eeramuudha.

“Eessaan narraa rafaa wayii

Way waa natti hin tollee

An kiyya jaalallee,

Tokkicha koo kuullee,

Ijaan arguu dhiisii,

Hin dhageenye oduullee,

Hin dhageenye sagalee.

Fageenyaa hin dhabinaa

Yoo dhageessan oduu

Qilleensarra hafee

Dachii samii gidduu

Ciniimmuu hiikama hin qabneenin miidhamee

Seenaa narraa hin baatuu yaadaan rarraawee

Yoo kutee dhageessan haajaa xiida diroo

Liphiidha itti gartan naa tilmaamaa dhiiroo

Naasuufi gammachuun garii aada hamaa

Ambayyoo too baasaa mee nallee hin jajinaa”

Kan biraas jira. Innis kunooti.

“Ijoollee afran qalloo dardara ammaan tanaa      

Ka’aa hirribarraa koottaa wal barannaa

Koottaa ni taphannaa tapha ammaan tanaa

Ka’aa hirribarraa koottaa ni bobbaanaa

Koottaa ni agarraa asumaan ol kaanaa

Koottaa ni sossoonaa waan nu boonsu goonaa

Ka’aa hirribarraa seenaa barreessinaa”

Waltajjiiliirratti afeeramee weelluu walaloonsaa kanatti aanee dubbifamu sirbeera.

“Qeerroon biyyaa yoo takka lole

Of duuba hin deebi’uu cabsee galuu malee

Aadaa isaatii duulli

Heera isaatii duuti

Dhiiga deeqqifataa dirree lolaa irratti”

Kanaafi kanneen birootiin walqabatee sirna Dargii keessa rakkoo guddaan narra ga’eera.

Bariisaa: Turtiin Awustiraaliyaa hoo maal fakkaata ree? Artist Alii: Yeroon Awustiraaliyaa dhaqes Oromootni achi jiraatan haala gaariidhaan na simatan. Mootummaan Awustiraaliyaas mana naa kenne. Qarshiis akka gaariittan argachuu jalqabe.  Awustiraaliyaatti ijoolee afurin godhadhe.

Biyyattiitti nama ijoollee godhateef qarshii guddaatu kennama. Anis haala kanaanan qarshii guddaa argachuu jalqabe. Qarshiin argadhuunis ummata Oromoofi firoota kiyya gargaaruun jalqabe. Yeroo ammaa ijoollee 14n qaba. Hundisaaniiyyuu guguddataniiru. Awustiraaliyaa waggoota 19n jiraadhe. Ammas achuman jiraadha.

Bariisaa: Jijjiirama yeroo ammaa Itoophiyaa keessa jiru akkamitti ilaaltu?

Artisti Alii: Yeroo ammaa guutuu ta’uu baatus Itoophiyaa keessa bilisummaan ni jira. Bilisummaa dhugaan xiqqoo hinqabdu. Yeroo ammaa rirmaafi daana’oo, geergoofi qiinqinii guddina keenya duubatti deebisan dhabamsiisuurratti xiyyeeffachuu qabna.

Xiqqoo ta’ullee Oromoon bilisoomeera. Waanti guddaan yeroo ammaa nurraa eegamu tokkummaa keenya cimsuudha. Ummatnis yeroo ammaa sirriitti dammaqeera. Namni gubatee hinbeekne ibiddaan taphata. Nuti waan hunda arginee barreerra. Amma kan nubaasu tokkummaa keenya cimsachuun guddina biyya keenyaatiif hojjechuudha.

Jijjiramni Itoophiyaatti mul’achaa jiru daran  nama gammachiisa. Sirbi Oromoo amma sadarkaa  addunyaatti sirbamaa jira. Qabsoo hoggansi haaromsaa Doktar Abiyyi Ahmad, Obbo Shimallis Abdiisaafi Jawaar Mahaammadfaan taasisaa jiran gargaaruu qabna. Tokkummaa sabootaafi sablammoota biroo wajjin qabnus daran cimsuudhaan tokkummaafi giddina Itoophiyaatiif hojjechuu qabna.

Bariisaa: Akkamitti gara biyyaa dhuftan?

Artisti Alii: Yunivarsitiin Haramaayaa na waamnaanin dhufe. Yunivarsitichi eebba barattootaasaarratti doktareetii kabajaa naa kenneera.  Doktareeticha argachuu kiyyatti hedduun gammade. Sirnicharrattis seenaa kiyya yeroo ijoollummaa kiyyaa kaasanii seenaa ani irraanfadhe na yaadachiisaniiru. Gaafa sana ana qofa osoo hintaane Oromoofi addunyaa maratu gammade.  

Bariisaa: Gara fuulduraatti maal hojjechuu yaaddu?

Artisti Alii: Ummata gorsuu, barattoonni barnootatti akka ciman gorsuu, tokkummaa cimsuu. Yeroon yeroo itti waa’ee  jaalalaa, nagaafi  tokkummaa itti labsaniidha malee yeroo sirbaa walfixaa, walajjeesaafi diina kee barbadeessiin itti sirbamumiti. Rabbi biyya keenya akka nuuf qajeelchuufis nan kadhadha. Yaa Rabbi diina keenya ajjeesi utuu hintaane, yaa Rabbi diina keenyatti nu araarsi jennee kadhachuu qabna.

Namni kamuu balleessaa ni dalaga. Qubni keenya tokko yoo madaa’e kunnee ofirraa gatna utuu hintaane yaallee fayyifanna. Nutis abalu hattuudha, abalu kana balleesseera jennee balaaleffachuurra gorsinee deebifachuu qabna. Ammaan booda biyyaaf dalaguu malee hojii biraa hinqabu.

Bariisaa: Gara biyyaatti deebi’uu hin yaadnee?

Artisti Alii: Miilli kiyya tokko asi jira miilli kiyya biraan ammoo Awustiraaliyaa jira. Ammaan booda miila kiyya Awustiraaliyaa jiru gara biyyaatti deebisuufan jedha.

Bariisaa: Waa’ee Gaazexaa Bariisaa maal beektu?

Artisti Alii: Qabsoon koo inni duraa gaazexicha deggeruudha ture. Gaazexaan kun kan Arfan Qallooti. Bariisaan Afaan Oromootiin maxxanfamuun gaazexaa jalqabaati. Gaazexichi yeroo ammaa jijjiirama gaarii agarsiisaa jira. Kana caalaa guddachuu qaban jedha.

Natsaannat Taaddasaatiin

Suurri Gabaaboo Gabreetiin

Gaazexaa Bariisaa Hagayya 25/2011