Finfinnee: Odeeffannoon qabiyyee lafaafi abbaa lafaa walitti fidu sadarkaa biyyaatti qindaa’aa jiraachuu Ministeerri Innoveeshiniifi Teknolojii beeksise.
Daarektarri Inistiyuutii Odeeffannoo Lafaa (‘Geospecial Information’) ministeerichaa, Doktar Tulluu Bashaa tibbana Gaazexaa Bariisaaf akka ibsanitti, qabeenyi lafaa waan murtaa’aa ta’eef, faayidaawwan adda addaaf oola jira.
Tokko tokkoon cittuu lafaa karaa ammaayyaawaan misooma qonnaafi investimantiif akka ooluuf dursa odeeffannoon qabiyyee lafaa suuraafi kaartaadhaan qindaa’uu qaba.
Waggoota shanan darban keessa odeeffannoo qabiyyee lafaafi abbaa lafaa walitti fiduuf sochiin bal’aan taasifameera kan jedhan Doktar Tulluun, kanaanis guutummaa magaalaafi baadiyyaa naannolee Tigraayi, Amaaraafi Beenishaangul Gumuzitti qabiyyeewwan lafaa xiyyaaraan kaafaman qindeeffamuu ibsu.
Naannolee Oromiyaafi Ummattoota Kibbaatti ammo dhibbantaan 50 kan hojjetame yoo ta’u, Affaariifi Somaaleettis jalqabbiirra jira jedhan. Hojiin qabiyyeewwan lafaa qindeessuu kun akka biyyaalessaatti dhibbantaa 43rra gahuusaas
himaniiru.
Odeeffannoon kadaastaraalii lafaas (tajaajila tokkoon tokkoon qabiyyeen lafaa kennaa jiru) naannolee hundatti hektaaraafi kaareemeetiraan qindaa’aa jiraachuu ibsanii, kunis qoqqoodinsi qabeenya lafaa haqummaa akka qabaatuuf kan gargaaruudha jedhan.
Walii galaan bal’ina lafa biyyattiin qabdu hektaara miliyoona 122.2 keessaa hektaarri miliyoonni 12.1 bishaaniin kan haguugame yoo ta’u, hektaarri miliyoonni 84.1 ammoo omishaafi omishtummaaf, akkasumas misooma investimantiif oolaa kan jiru ta’uu dubbataniiru.
Bariisaa Ebla 4 /2011
Takkaalliny Gabayyootiin
4 Comments to “Odeeffannoon qabiyyee lafaafi abbaa lafaa walitti fidu qindaa’a jiraachuu himame”