“Paartiileen Oromoo walirratti dorgomnee sagalee sabaa hiruu hinqabnu”

• Piroofesar Mararaa Guddinaa
  

Finfinnee: Paartiin Madrak ji’oota sadan darban keessatti hoggansasaa jabeeffatee deebisee ijaaruuf yaaluusaafi hojii mootummaan hojjetaa jiru keessattis hanga ta’e qooda fudhachaa jiraachuu Pirezdaantiin Madrakiifi Durataa’aan Kongirasii Federaalistii Oromoo (KFO) ibsan.

Pirezdaantiin Madrak Piroofesar Mararaa guddinaa qophii filannoo paartichaafi dhimmoota wayitiirratti gaazexaa Bariisaa waliin gaafdeebii Roobii darbe taasisaniin akka jedhanitti, paartiin isaanii akka Madrakittis akka KFOttis filannoo waggaa dhufuutiif gamanumaa qophii eegaleera. KFOn maallaqa deggarsa biyya alaarraa argateen leenjii addaddaa kennuus eegaleera.

Leenjii kanas bakka sadiitti qooduun marsaa duraatiin kaadhimamtoota 60 oliif Finfinneetti leenjiin kennamuufi fuulduratti ammoo Adaamaafi Naqamteetti kan kennamu ta’uu eeranii, leenjii inni Finfinnee kan xiyyeefate haala itti dorgamuu danda’an, sagantaa, caasaafi imaammata paartichaa, seenaa, aadaafi qabsoo Oromoo, fedeeraalizimiifi kkf irratti yoo ta’u, miseensoonni paartichaafi hayyoonni addaddaa leenjii kennurratti hirmaachuusaanii addeessaniiru.

Leenjiin kennamu yoo xiqqaate Oromiyaa keessatti aangoo qooddachuuf (power share) yoo jabaatan ammoo, akka Oromiyaatti KFOtiin, akka Itoophiyaatti Madrakiin mo’uuchuudhaaf kan gargaaruu ta’uus ibsaniiru.
KFOn paartiilee Oromoo biroo waliin hojjechuu kan barbaadu yoo ta’u, ABO waliinis walitti makamuudhaaf mariitti jiraachuu kaasanii, “Paartiileen Oromoo walirratti dorgomnee sagalee sabaa hiruu hinqabnu” jedhaniiru.

Akka Madrakittis ta’e akka KFOtti ABO irraa kan hafe paartileen walitti makamuuf gaaffii dhiheessan hinjiran kan jedhan Pirofeesar Mararaan, isaanis ofiin kanitti adeeman akka hinqabaanne himaniiru. Yaada walitti makamuu kan qabuus paartileedhuma alaa dhufanii malee warri biyya keessa silumayyuu intalaashee mootummaa waan turaniif makamaniis dhiisanis faayidaa akka hinqabnee kaasanii, warra qabsoo Oromoof jedhee manaa ba’ee wajjiin tokko ta’uuf garuu irratti hojjechaa jiraachuu addeessaniiru.

Sirni demokraasiifi qabsoon bilisummaa adda baafamanii hin ilaalaman kan jedhan pirezdaantiin Madirakiifi Durataa’aan KFO, Oromoon biyyasa keessatti abbaa biyyaa ta’ee ofiin of bulchuu, qabeenyasaarratti ajajuu, bulchuufi dhimma itti ba’uu yoo danda’e bilisummaas demokraasiis ta’uusaatiin yaadni qofaatti achi ba’uu yyeroon kan itti darbeef bu’aa kan hinfidne ta’uu addeessaniiru.

Jijjiirama amma jiruun walqabatee waggaa 27 guutuu mootummaan ummata dararaa ba’uusaafi ummanni qabeenyisaa saamamaa, hidhamaa, ajjeeffamaa turuusaa eeranii, amma wanti jijjiiramaa jiru jira; seerri haaraa tumamaa jiraachuun, ministirri muummee paartilee morkattootaa waliin mari’achuu eegaluun, mirgi namummaa dubbachuufi of ijaaruun eegamuu jalqabuun fakkeenya jijjiiramaa ta’uu kaasaniiru;

Ta’uus wantoonni baay’ee ammayyuu kan hafan ta’uu kan ibsan Piroofesar Mararaan, seeronni ba’aan hojiitti hiikamuu dhabuun, mootummaa Oromoon filate bulchuu dhabuun hanqina ta’uu dubbataniiru.

Kanaafis agarsiifni bakka hedduutti dabbaloonni ummata miidhaa, saamaafi hiisisaa turan ammayyuu bulchaa jiraachuusaaniitiin ummanni gaaffiilee “haaromsi nu bira hingeenyee, jarri kun maal nurraa hojjetu?” jedhuufi kanneen biroo kaasaa jiraachuu ta’uu ibsaniiru.

Jijjiiramni jiru garuu karaa walakkaa ga’uusaafi abdiinis jiraachuu ibsanii, “fuuldurattis kun jabatee filannoo dhugaan adeemsifamuu akka mala yookiin ammoo biyyattiin duubatti deebitee gara rakkootti deebi’uus akka dandeessi. Wanti dhumee baay’een hinjiru, boriifi iftaan garuu kan caalaa deemuun ni danda’ama.

Kanaaf abdiin keenya ofeeggannoodhaan kan guutamedha. Abdiin kun garuu dhumeera, fixanneerra, haaromsi dhufeeraa, kanaa booda sabni keenya hindararamu, hinhidhamu, qabeenyi irraa hinfudhatamu waan jennu hinqabnu. Garuu mootummaa wajjiin wantoota saba keenyaaf bu’aa fidan irratti qooda fudhachaa jirra” jedhu

Saamraawiit Girmaatiin

Bariisaa Bitootessa 6/2011