Hawaasaa: Yeroo yerootti jeequmsa magaalattiitti uumamuun hawaasni dararamaa waan jiruuf mootummaan haalichaaf xiyyeeffannoo kennuu akka qabu dargaggootni magaalattii gaafatan.
Haaromsi hanga ammaatti magaalattii waan hinqaqqabneef ummanni jireenya tasgabbaa’aa dhabuusaa kan himan dargaggootni kunniin, magaalaan jaalalaan beekamtu ammaan tana sodaa keessa jiraachuu ibsu.
Caasaaleen mootummaan hedduun shira baroota darban magaalattii tasgabbii dhorkuuf xaxame irraa kan hinqulqulloofne ta’uu kan ibsu Dargaggoo Junaddiin Ibrahim, keessumaaa caasaan bulchiinsaafi nageenyaa warroota rakkoo uumaa turaniin waan guutameef qoratamee sirraa’uu baannaan magaalattiin yoomillee tasgabbaa’uu kan hin dandeenye ta’uu ibsa.
Qaamni nageenyaa kaleessa ummata hiriira bahe fixaa ture gaafa biyyattiin tasgabbooftetti seeraan gaafatamuunsaanii akka hinoolle baranii jijjiirama kana gufachiisuudhaaf halkanii guyyaa wixirfachaa jiraachuusaaniis eeree, mootummaanis kana hubatee dhimma magaalattiitiif xiyyeeffannoo kennuu akka qabu gaafata.
Ummanni dur jijjiiramaaf du’aa ture ammaan tana jijjiiramicha tiksuuf hanga lubbuusaa kanfaluutti ga’uunsaa hawaasa magaalattiifi ollaashii sodaa keessa galchaa jiraachuus himeeera. Jeequmsi magaalattiitti uumamaa jiru kontirobaandistootaafi qaamota nageenyaa pirezdaantiin duraanii Somaalee hundeessaniin ta’uu kan himu immoo Dargaggoo Obsaa Aliyyi.
Ammaan tana pirezidaantichi seera jala oolus harcaatonnisaa warri inni achitti ijaare dhokatanii ajandaa kaa’ameef raawwachaa jiraachuu dubbata. Waan ta’eefis mootummaan harcaatota kanneen tokko tokkoon funaanee seeratti dhiyeessuu qaba jedha.
Bariisaa Amajjii 24/2011
Bayyanaa Ibrahimiin
2 Comments to “Dhimmi Dirre Dawaa xiyyeeffannoo akka argatu gaafatame”