-Dagate ayyaanna ayirrinsanni gara lainohunni lallawu hedo uurrinshu komitera massagino;
-16 yooaano mootoonso kaajjishino
Addis Ababa:– Dagate ayyaanna kaajjishatenni, seeru egennamooshshe aatenninna dagate ayyaanna ayirrinsanni woyte hasiisanno agarooshshenna miidiyu iillo mootimmatewinni afidhanno gede assatenni dagoomittenna miinju qeechansa lossa hasiissannota xawinsi. 16 yooaano mootoonsono kaajjinshoonni.
Dagate riqiwamaano amaale mini lamalate giddo harisino 3ki loosu diri 16ki uurrinshu gambooshshinni dagate ayyaannanna ayyaanna ayirrinsanni gara kaajjishate shiqqinota lallawu hedo, Itophiyu meedaaliyu, Nishaanetenna baraarshu lallawi hedo buuxe tittirote laooshshira hajo la’annonsa uurrinshu komitera massagino. Hattono Itophiyu tuqu xaadooshshi biilloonyi loosaasinete gashshooti wodho kaajjishino.
Mootimmate woshshamaanchi ministirchi kalaa Tesfaye Beljigehu lallawu hasiishsha dagate ayyaanna amma’note, budu, dhaggetenna dagoomittete amanyootta agarino garinni keerunna iibbadu garinni ayirrisantanno gede assa hasiissannota xawisino.
Dagate ayyaanna qansootu akatoominna buqqeete gatamarshi, dagatenna mootimmate dagoomittetenna miinju kaa’lonsa luphiima ikkasenni seeru mittoo’ma aanna gobboomu deerrinni ayirrisantanno gede assa hasiissannota kalaa Tesfaye kayisino.
Dagate ayyaanna hasiissannohu mootimmatenni agarooshshenna illacha uyineennansa amma’note, budunna dhaggete ayyaanna agarte iibbadunni, keerunna qansootu mimmitu danchummate xaadooshshi bowiranno garinni assa hasiissannota qummeessino.
Gobbatenna dagate dagoomittetenna miinju horo bowirsanno garinni ayirrisantanno gede assate haaro seera fushsha hasiissinota egensiisino.
Amaalete mini 16ki yooaano mootoonso kaajjishino. Mootoonsinoonniri mereerinni sasu meentoho;mootoo’maano farcote amanyootinni hananfoonni haaroonso gumulate kaa’litanno yine hexxo tungoonnireeti yino.
Yoote mine borrote duunama leeltinota kayisatenni; leeltannota loosu xiiwo shotissanno yine agarranni yino. Farco halashshate mootoo’maano ikkado loosu rosicho, rosu qixxaawonna danchu akatoomi noonsare ikkansa mootimmate woshshamaanchu ministirchi kalaa Tesfaye Beljigehu coyi’rino.
Hajo la’annonsa bissara uurrinshu komitera massangoonnihu Itophiyu Meedayi, Nishaanetenna baraarshu hedo gobbatenna Afrikaho woyi kalqoomu deerrinni babbaxxino handaarira gobbatenna dagate hattono xaphoomunni mannu oosora kaa’lannoha jawa looso gumultino mannooti woyi bissara afansha aatenni woloota lawishsha ikkitannore harunsitanno gede assate ikkinota kalaa Tesfaye xawisino.
Bayiriidi seeri garinni gumulshu lallawi fulinsakkinni uyinanni hee’noonniri babbaxxitino baraarshuwa seeru amanyooti giddora eessate ikkinota xawisino.
Qiddist Gezzaheny
Bakkalcho Badheessa 5, 2016 M.D
