Addis Ababa:- Bakkalcho gazeexi Federaalete deerrinni Sidaamu afiinni attamame fulasi daga mashalaqqe shotu garinni afidhannonna nabbabbanno gede assatenni jawa qeecha fulanni noota Aliyye Sidaami zoone qaru gashshaanchi kalaa Biruk Selemooni xawisi.
Gaazeexu Sidaamu afiinni attamamasi mitto soorrote guma ikkinotano farci`rino.
Daga babbaxxino qooxeessira daggino soorro, latishshu gumma afiisenni huwattanno gede assatenni gobbateno ikko qoqqowu deerrinni fultannota haruudde mashalaqqubba iillishanni afamannota coyi`rino.
Aliyye Sidaami zoone gashshaanchi kalaa Biruk Selemooni tenne lamala 5ki diri umi kiiro addi attamo lainohunni IPUra xawisino garinni; Sidaamu daga afoose, budese lossi’ra dandiitanno garinni qixxaawe shiqanno gaazeexa ikkinota buuxisino.
Gaazeexu qoqqowu giddo babbaxxino handaarinni gumulantanni noota latishshu loossa wolootta qoqqowubbaranna gobbayidi gobbuwara hala`ladunni egensiisatennino sae wolootta afuubbanni yaano Addis zemeni, Oromote, Ingiliizete, Arabetenna Tigirinyunni qixxaabbanno gaazeexubbara Sidaamu daga latishsha egensiisatenni luphiima qeechanna kaayyo afi’nanni gede assinota xawisino
Kunino qoqqowoho noota investimentete injoo kalqete egensiisatenna goshooshate jawu dhuki noosita leellishanno yiino.
Aliyye Sidaami zoone Itophiyu pireesete uurrinshate ledo halamatenni lamala lamatenni borro qixxeessitanni afantannota buuxise; gaazeexu iillo halashshatenna daga qoqqowisera baxxinohunnino zoonete tonnente tantano giddo loosantanni noota latishshu loossa buuxxanno gede assate yawonke fulleemmono yiino.
Jeefoteno gobbate gede niwaawete budinke, mashalaqqe afi’rate noonke hasatto laafa ikkitinota coyi`re; tenne foonqe taashshi`ratenna nabbabbanno dilama kalaqate kaajjine sharrama agartannota sokkasi saysino.
Abbebech Maatewoos
Bakkalcho Bocaasa 12, 2017 M.D
