Addis Ababa:- Bakkalcho Gaazeexi Federaalete deerrinni attamamasi afuu lophora dancha kaayyo kalaqinota Sidaamu Qoqqowi Woga Turizimenna Ispoortete Biiro Layinki Sooreessinna Wogate Handaari Sooreessi Kalaa Daawit Dangiso coyi’ri.
Sidaamu daga qoqqowo ikkate dagate huuro harinsoonniha Bocaasa 10, 2013M.D kaima assatenni xintaminohu Bakkalcho Gaazeexi guuta shoole diro ikkeenna 5ki diro hanafasi kaima assatenni Kalaa Daawiti uurrinshankera uyno hedonni; Sidaamu daga umise mootimma safi’rate seeda yanna sharro assitanni keeshshitino.
Qoqqowo ikkate sharro adda ikkitu gedensaannino qoqqowu bayiriidi seerinni Sidaamu afii loosunniha ikkanno gede assinoonni yiino.
Tenne yannara Sidaamu afii qoqqowoho loosunniha hattono rosunniha ikkasi kayse; qoqqowo ikkatenni afi’noonni kaayyo mereerinni afuu lophono lowontanni hala’litanni hadhinota xawisino.
Konni albaanni zoonete tantano deerrinni hee’noommo yannara afuu karsama leeltannotanna xaa yannara kayinni afuu lopho bilchaata ikkase la’noonnita coyi’rino.
Bakkalcho Gaazeexi attamamasi hasiissannota yannate mashalaqqe attamote miidiyinni dagate iillishate ragaanni lowo injo kalaqino yiinohu kalaa Daawiti; afuu borronniha ikke lophanno gede kalaqino kaayyo jawa ikkitinota kaysino.
Afuu lopha dandaannohu babbaxxitino elekitirooniksete tuqu xaadooshshuwanni hattono attamote miidiyinni borreessammete afoo ikke rosunna loosunniha ikkiroti yiino kalaa Daawiti.
Kalaa Daawiti xawishshi garinni; babbaxxitino mashalaqqe wolootta daganni ledo soorri’ratenni dagate mereero heedhanno lamoommenna danchu xaadooshshi kaajjanni ha’ranno gedenna gaazeexu yanna yannantenni kalaqantannota haaro ikkitubba borrotenni haa’re fulanno daafira nabbawate budino lophanni ha’ranno.
Afuu borronniha ikke latanninna bowiranni ha’rateno ledote yannate mashalaqqe dagate iillitannonna nabbawate budi lophora hala’lado kaayyo kalaqanni afamannotano lede coyi’rino.
Amsaalu Felleqe
Bakkalcho Bocaasa 12, 2017 M.D
