Bakkalcho Gaazeexi Federaalete deerrinni attamama hanafinkunni shoole diro guutise tayxe ontikki diro hanafanni nooha ikkanna; Federaalennita ikkito qoqqowu mashalaqqe dagatenna dagoomaho iillishate widoonni jawa qeecha fulanni no hojjicha gaazeexaati. Konne ikkinohura, gaazeexu giddo shiqqanni noo borro isilanchimma yanna yannantenni woyyaabbanni dagginota qoqqowu giddo noo Bakkalcho Gaazeexi nabbawaanonna gutunni loossanno uurrinshuwa farcidhino.
Kalaa Tegenyi Woldehu, Mixotenna Latishshu Biiro Mootimmate Komunikeeshine Hajubba Dayrektoreete Dayrekterchi, Bakkalcho Gaazeexi aana hedo aanni; Bakkalcho Gaazeexi Federaalete deerrinni attamame nabbawate shiqasi hattono heewisamaancho ikkasi Sidaamu sharrame abbino guma ikkinota xawise; kuni gaazeexi Sidaamu Afii lophora, borreessammete widoonni jawa qeecha fulanni nootano coy`rino.
Kalaa Tegenyi, Sidaamu daga kiiro haammata ikkiturono, konni garinni Sidaamu Afii Federaalete deerrinni lophe fulikkinni keeshshinota qummeesse; xa kayinni Federaaalete deerrinni wolootu afuubba ledo taale attamamasi afoo lossate jawa kaayyo ikkinota egensiisino.
Bakkalcho gaazeexi yanna yannantenni isilanchonna woyyaabbino amado haa`re shiqanni noota qummeessinohu kalaa Tegenyi; ikkollana, tuqishshasi eeli geeshsha halashsha hasiissano yiino.
Aliyye Sidaami Zoone Jireenyu Paarte Wedellu Liige Sooreessi wedellichu Tesfaye Kaasihu coy`ranni; Bakkalcho gaazeexi Federaalete deerrinni Sidaamu Afiinni attamamasi mootimma abbitino soorrote kaayyonna Sidaamu sharro guma ikkinota qaagiisse, baxxinohunni wedellu afoonsa lossidhara jawa kaayyo kalaqino yiino.
Konni albaanni Sidaamu Afii raadoone eiro hiiqqanno yine minshanni afiira barru fuleenna attamamasi Sidaamu dagara jawa tiro noosita qummeesse; kuni Sidaamu Afii gobbate deerrinni lophanni ha`rasi leellishannoha ikkinota xawisino.
Konne gaazeexa halashshine tuqishshisi eeli geeshsha iillanno gede assa hasiissanno; rosu minna gattukkinni gaazeexa iillishanna tuqisa qara looso ikkitanno gede jawa qeecha fula hasiissanno yaannino guwursino.
Jireenyu paarte wedellu liige sooreessa ikkasinni gaazeexu yanna yannatenni ruxxi yiikkinni/ deamikkinni sufanno gedenna baalunku dagoomi nabbawannoha assate qeechasino fulannota kulinohu wedellichu Tesfaye; amadosinna isilanchimmasi yanna yannantenni haaroonsinanni ha’ra kayinni addinta hasiissannota ikkitinota buuxisino.
Bakkalcho gaazeexa lamala lamalatenni dayee iillanke geeshsha quqquxammanni agadhineemmo gaazeexaati yaanni coy`rinohu Haymaanooti Yilma, Aletta Wondi Woradira Komunikeeshinete ogeessaati.
Haymaanooti huwanyosi xawisanni, Bakkalcho Gaazeexi Addis Ababunni attamame daanno geeshsha nabbawaano quqquxamatenni agartannota coy`re; Sidaamu Afii lophora konneeti yine kullannihura aleenni ikkino qeecha afi’rinota hawaqisino.
Kalaa Haymaanooti yaatto garinni, Bakkalcho gaazeexa nabbawa hanaffunkunni haammata daga nabbawanna borreessate dandoo jawu garinni woyyeessidhanni dagginota coy`re; lamala lamalatenni, gaazeexu daye iillihunni layinki soodo Bakkalcho gaazeexi giddo borreessinoonni gafa mitto doodhatenni gaamotenni nabbabbe mimmitu ledo hasaabbanno pirogiraame noonsatano kulino.
Konni daafira, gaazeexa nabbawate hasidhanno daga kiiro lexxxitanni dagganni noo daafira kiirosi ledatenni baalunku nabbawe hegersanna borreessate dandoo hattono yannate mashalaqqe hegerse huwanyo afi’ranno gede halashshine attama hasiisannota kalaa Haymaanooti hedosi worino.
Konnira, nabbawaano Bakkalcho gaazeexi yanna yannatenni shiqqanno mashalaqqe, borrosinna amadosi woyaabbanni dagginota coydhino.
Abrahaam Saamueel
Bakkalcho Bocaasa 12, 2017 M.D
