Kaajjado massagote hayyonni maatete jireenya buuxisiisate kaajjine loonsanni hee’noonnita Sidaamu qoqqowi Aliyye Sidaami zoone gashshooti xawisi.
Aliyye Sidaami zoone qaru gashshaanchi kalaa Addisu Qaa`misohu xawisino garinni; “kaajjado massagote hayyonni maatete jireenya buuxisiisate deerra deerraho noo mootimmatenna paartete ledo halamatenni illacha tunge loonsanni hee’noonni loosi sufe ha`ranno gede assate jawa jirsa tunge loonsanni hee’noonni.
Xaa yannara woraddatenna quchumu gashshootira mootimmate loosaasinera uynanni hee’noonni qajeelshi maatete jireenyi paakeeje jeefisate jawa injo kalaqannoha ikkinota kalaa Addisu xawisino.
Ledoteno mootimmanna paarte mixote tuggino maatete jireenyi paakeeje jeefisate deerra deerraho noo bissa ledo halamatenni kaajjadu garinni loonsanni hee’noonniha ikkanna, xaa yannara massagaanotenni kaynse mootimmate loosaasinera uynanni hee’noonni qajeelshi maatete jireenya abbate jawa qeecha afi`rinotatano sooreessu buuxisino.
Jiraameette gobba ijaarsatenna jirotenni baaliiqqino maate kalaqate aantete woyyino gumira loosatenni maatete jireenyi paakeeje gumulsiisatenni daganke horaameette assate loossa jeefisate baalunku hajo la’anno bissa qeechi jawa ikkasi kule; halammete dhukinni loonsummoro daganke baalunku handaarinni latishshu doogora bobbaasa dandiinannita qummeessino.
Gaazeexu odeessaanchinni
Bakkalcho Badheessa 5, 2016 M.D
