– 40 kume rosaano gobboomu fonqolo adhate borreessantino
Addis Ababa:- Qoqqowoho sai rosu dirira maareekkaminoha 12ki kifile gobboomu fonqoli guma woyyeessate tayxe fonqolamaano qixxeessitanni noota Sidaamu qoqqowi Rosu Biiro egensiissu.
Xaa geeshsha 40 kume rosaano gobboomu fonqolo adhate borreessantinotano xawinsoonni.
Qoqqowu Rosu Biiro miseessunna rosa, rosiisatenna keenote handaari sooreessi kalaa Taaffese Gebremaariyam Itophiyu pireesete uurrinsha xawisino garinni; qoqqowoho saihu rosu dirinni maareekkaminoha 12ki kifile gobboomu fonqoli guma woyyeessate rosaano babbaxxitino hayyonni irkinsanninna guwuurshu roso uynanni hee’noonni.
Qoqqowoho afantanno baalante rosi minnara guwuurshu roso aatenni rosaano irkinsate loossa hala’ladunni loonsanni hee’noonitano Kalaa Taaffese coyi’rino.
Rosaanote guma woyyeessa lainohunni Biirote massagaano, rosiisaanonna rosaanote maate ledo hasaawa assinoonnita xawisinohu kalaa Taaffese; rosaanote fonqolu gumi woyyaamberanna fonqolu gumi woffi yaanno gede kaima ikkitino korkaattanna qarrubba bande tirate dandiinanni garinni raga worre loosu giddora e’noonnitano qummeessino.
Gobboomunna qoqqowu deerrinni uynanni fonqolo adhitanno rosaano irkisateno addi illacha tungoonnita kayse; rosaano sai rosu dirinni woyyaawinoha fonqolu guma maareekkisiisa dandiitanno gede illachinshe irkinsanni hee’noonni yiino.
Maareekkaminoha woffi yino guma woyyeessate rosiisaano fooliishshote yannansa lede horoonsidhe rosaano irkissanni afantannota egensiisino.
Tayxeha 12ki kifile fonqolo adhitanno rosaano borreessate looso baalante zoonnara harinsanni hee’noonniha ikkanna; xaa geeshsha 40 kume rosaano borreessantinota kulino.
Biiro sai rosu dirinni 54 kume rosaano fonqolsiisa dandiitinota kulinohu sooreessu; kuri giddonni 1.99% ikkitannori calla jajjabba rosu uurrinshuwa ea dandiitinota qummeessino.
Rosu loosi gummaamo ikkanno gede rosaanonna maatensa illacha tuga hasiissannota coyi’re; rosaanote gumanna rosu amanyooteno woyyeessate baalunku qeechasi fula hasiissannota amadisiise sokkasi saysino.
Amsaalu Felleqe
Bakkalcho Badheessa 5, 2016 M.D
