Addis Ababa:- Albisu Itophiyu pireesete uurrinsha odeessaanchi Iyyoob Gidey madaarshu amuraate oyimbarra gumulloonni.
Madaarshu amuraate harinsoonnihu odeessaanchu maate, baxillaanosi, fiixu firunna loosu miillasi leeltinowa Addis Ababu quchumira Asko yaamamanno qooxeessira afamanno Abune Habtemaariyami gedaameraati.
Odeessaanchu Iyyoob Gidey annisi kalaa Gidey Ambayenna amasi dukko Haregu Goytomiwiinni Badheessa 11/1958M.D Sudaanete gobbara Kesela yaamamanno qooxeessira ilami.
Odeessaanchu Iyyoobi uminna layinki dirimi rososi Sudaanete Kesela uminna layinki dirimi yaamamanno rosi mine harunsinoha ikkanna; hakkiinnino lowiidi layinki dirimi rososi Tiyuniyaan Kesela Boys March rosi mine harunsino.
Jajjabba rosu uurrinsha rososino Itophiya daye Addis Ababu Yuniversitera dipiloomunni maassamino
Ledoteno, Addis Ababu Yuniversitera odeessaanchimma rosu golinni umi digiresi maassaminoha ikkanna; layinki digiresino tenne Yuniversitera ‘’Philology’’ (Afuu kaimi dhagge xiinxallonna lopho) rosu golinni harunsino.
Odeessaanchu Iyyoobi Badheessa 15/1982M.D kayse Badheessa 1/2016M.D hedeweelcho reyonni tenne kalqenni baxxa geeshsha Itophiyu pireesete uurrinshara Arawete Afiinni attamamanno ‘’Al-alem’’ yaamamanno Gaazeexi qixxaawo kifilera 34 dirrara babbaxxitino loosu madabbanni owaatino.
Birra 1/2006M.D hanafe lubbosi hedeweelcho xissonni sa’inohu Badheessa 1/2016M.D geeshsha Itophiyu pireesete uurrinshara attamamannoha ‘’Al-alem’’ Gaazeexi qara qixxeessaancho ikke gobbasi owaatino.
Ledoteno, odeessaanchu Iyyoobi 1982M.D hanafe ‘’Al-alem’’ Gaazeexa buuxaanchimmatenni hanafe babbaxxitino madabbara loosinoha ikkanna; layinki qixxeessaanchimmanni hattono qara qixxeessaanchimmanni loosino.
Odeessaanchu Iyyoobi ogimmasinna loosisira noosi addi baxillinna ammanama luphiima ikkasenni gobbasi horonna ayirrinye agarsiissannota addi addi borro qixxeessanni Arawete gobbuwa Gaazeexubbanna dagoomitte mashalaqqe qoollanni attamisiisa dandiino.
Baxxinohunni, Itophiyu haaroo’mate kofonna labbino gobboomitte hajubba lainohunni babbaxxitino borro qixxeessatenninna gobbasi daafira yekkeeramatenni egennamanno. Lawishshahono, Ara Kubba, Nuba Times, Al-minilinna Sudanayli Sudaanete tuqu xaadooshshi hattono Al-Arab yaamamanno Kuwataarete Gaazeexubba kullannireeti.
Odeessaanchu Iyyoobi galtesi dukko Meseret Gebremaariyamiinni lame ooso ilino.
Odeessaanchu Iyyoob Gidey Badheessa 1/2016M.D ilamihunni 58 dirisinni xaaddinosi hedeweelcho xissonni reyotenni baxxasi qaangannite.
Gaazeexu Odeessaanchinni
Bakkalcho Badheessa 5, 2016 M.D
