Addis Ababa:- Adaare xaphooma Hospitaalera amuwunna marqu qaaqquulli reyo ajishate illacha tunge loosatenni xaa yannara woyyaawa guma maareekkisiisa dandiinoonnita Hospitaalete Loosu harisaanchi coyi’ri.
Adaare xaphooma Hospitaale loosu harisaanchi Kalaa Zennebe Turce uurrinshankera xawisino garinni; baxxinohunni, amuwunna marqu qaaqquulli reyo ajishatenna fayyimmansa buuxisiisate Hospitaale jawa illacha tugge loossanni afantanno.
Amuwu reyora qaru korkaati qooxeessaho afantannori fayyimmate uurrinshuwa yannatenni jajjabba fayyimmate uurrinshuwara soyaa hoogate yiinohu kalaa Zennebe; konne qarra tirateno balanxe olluubbate deerrinni amuwu ilate albiidi buuxo assi’ranno gede, amuwu foreme harisa, qooxeessaho afantanno fayyimmate mereershubbara buuxo assi’ranno gede jawaachinshanni loonsannita xawisino.
Konni garinnino, sa’u lee aganna giddo mitticho ama calla gama’mitanni keeshshite seeda doogo hodhite daasenni kalaqamino qarrinni gawajjantinota kulinohu Loosu harisaanchi; xaa yannara Hospitaalete dagganni ilate yannanna ilate gedensiidi fayyimmate owaante afidhanno amuwinna marqu qaaqquulli reyo ajjinota coyi’rino.
Ikkollana, marqu qaaqquulli reyo lainohunnino Istaandaardete aleenni ikka hoogirono; reytu gedensaanni ilantanno qaaqquulli xaano noota kulinohu Hospitaalete Loosu harisaanchi; konnirano korkaatu, godowii noo amuwi Hospitaalenke daggara albaanni qooxeessinsara afantanno fayyimmate uurrinshuwaranna mine seeda yannara gama’mitanni keeshshate kaiminni godowa noo qaaqquulli fugamate reqeccaawa bandoonnita kaysino.
Konni albaanni xaggate anje xaaddanna owaatamaanote widoonni kalaqantanno foonqubba rahotenni tiratenni lifixanna isilanchimma noota fayyimmate owaante aate dandiinanni garinni barru barrunkunni uynoonni owaantenna xaaddino mitiimmubba keennanni qarrubba tirranni hee’noonnitano xawisino.
Konni kaiminni, uurrinsha babbaxxino dhibbu dana xagisate lowonta hasiissanno xagga garunni shiqishate ragaannino xaa yannara 95% iillitinoha ikkanna; owaante woyyaabbanni daasenni owaatamaanote kiirono lexxitanni daggino yiino.
Laabiraatoorete owaante lainohunnino konni albaanni xaaddanni keeshshitino foonqubba yanna yannantenni keennanni tirroonnitano buuxisino. Uurrinshankeno Hospitaalete leellite buuxate assitino wo’naalshinni xaggate anje tirate dagate Faarmaase owaatamaano tultaabbannokki basera afidhanno gede assinoonnita buuxxino.
Hospitaalete babbaxxitino owaantete handaarranni sa’u lee agannara calla 120 kume ale ikkitanno owaatamaano fayyimmate owaante afi’ra dandiitino yiinohu loosu harisaanchi; qoqqowunnino sae 3 miliyoone ikkanno qooxeessu dagoomira owaante uytanno yine hendannita xawisino.
Wole widoonni, Hospitaale seeda diro kiirsiissinota ikkiturono, uytanno owaante hala’linyi garinni ijaarshubba halashshinikkinni keeshshineenna kalaqantino ruukkamme tirateno xaa yannara G+8 fooqe ijaara ollohinsanni hee’noonnitano bjuuxisino.
Adaare hospitaale baca xagisate owaante uyitanni afantannotanna ilaano keerunni furga’e hagiidhitanni qaaqquullensa sunqitanni fultanno amuwa hasaawisoommo garinnino Hospitaalete owaantenni kassi yitinota coyidhino.
Amsaalu Felleqe
Bakkalcho Badheessa 5, 2016 M.D
