Addis Ababa:– Sidaamu qoqqowira laashshaano Industirra latishsha halashshate gumulloonni loosinni handaaraho leeltino foonqe halamme tirate dandiinoonnita qoqqowu pirezidaantichi kalaa Desta Ledamo xawisino.
“Itophiyu laashshona ninkeno geexi’no” yaanno adawarshinni qixxeessinoonnita millimillotenna huwanyoote kalaqate bare harinsoonni.
Bare harunsine qoqqowu Industirete millimmo lainohunni qixxeessinoonni leellishonna reqeccono faajjetenni fannoonni.
Ba’rete aana leelle sokkasi sayisinohu Sidaamu qoqqowi pirezidaantichi kalaa Dasti Ledamohu coyi’ranni; qoqqowu mootimma handaaraho baxxino illacha tugge loossanni afantannota kayisino.
Baxxinohunni sa’u lame dirra kawa laashshaano Industirra latishsha halashshatenna miinju horonsiraanchimmansa lossate illacha tunge loonsanni keeshshinoonnita qummi assino.
Handaarho leeltino foonqe mereerinni wolqate shiqisho anje, baattote ruukkimmanna dikkote mittoo’ma qarrubba lawishshu gede kayisinohu pirezidaantichu; halamme gumulloonni loossanni noo mitiimmubba tira dandiinoonni yinno.
Kurinna labbeemme qarrubba tirate qoqqowu mootimma Industirete biiro umose dandiite tantanantanno gede assatenni aleenni qoqqowoho afantannore federaalete uurrinshuwa hanqaffe amaddino Industirete latishshi amaale mine uurrisatenni qinaambe loonsanni keshshinoonnita kayisino.
Handaaraho leeltino foonqe tidhamansa harunsite looso uurrisse keeshshitino Industirra looso hanaffinotanna laashshate dhukinsano lexxinota qummi assino.
Xaa yannara Industirete handaarinni dureeyye goshooshate illacha tungoonni yinohu kalaa Desti; handaara halashshatenna miinju horonsiraanchimmansa buuxisate qoqqowu mootimma illacha tugge loossanni afantannota coyi’rino.
IFDR Industirete ministere ministrdieeti kalaa Hasen Mehammedihu millimillote bare aana afame assino hasaawinni, Itophiyu laashshona millimillonni hanafantino loossa haammata guma borreessiissanni noota kaysatenni; Industirete laalchimma hekko tirtanno poolise gobboomu deerrinni qixxeessine loosu giddora e’noonnita kulino.
Sidaamu qoqqowi Industirete latishshi biiro sooreessi kalaa Gosaye Godaanihu isi widoonni, gobba giddo laalcho halashshatenni meessi dhukinni Industirra jawaachishshanno mixo amande gumulloonni loosinni qoqqowu garinni balaxotenni Itophiyu laashshona millimillo qaddo assine massaga dandiinoonnita kayse;laashshaano industirra handaarira sufo noo latishshanna heewisamaancho injoo kalaqa dandiinoonnita kaysino.
Millimillote ba’rera qoteho qoqqowu Industirete millimmo lainohunni qixxaabbino leellisho qoqqowi pirezidaantichinna Industirete ministdieeti kalaa Hasen Mehammedihu faajjetenni fantino.
Qiddist Gezzaheny
Bakkalcho Badheessa 5, 2016 M.D
