Addis Ababa:– Itophiyu uurrinshuwa Ahiguretenna kalqoomu deerrinni heewisamaanchimmansa lossi’ra hasiissannonsa yaanni Xaphoomu ministirchi Abiy Ahimed (Dr.) coyi’ri. Itophiyu uurrinshuwa seyoote baraarsha aate amuraate Adiwu qeelle qaaggora oyimbarra harinsoonni.
Xaphoomu ministirchi Abiy (Dr.) tenne yannara; gibrinnaho (Qamadete laalchi pirogiraamenni), Itophiyu Diilallote doogora, Itiyo-Telekoomete, Itophiyu
Poostu uurrinsharanna Bayiriidi haaroo’mate kofo ijarshi pirojektera afanshanna baraarsha uyno.
Baraarshanna afansha uyi yannara assino hasawinnino; Iophiyu uurrinshuwa Ahiguretenna kalqoomu deerrinni heewisamaanchimmansa lossi’ra dandiitanno doogga kalaqa hasiissanno yiino.
Itophiyu uurrinshuwa seyoote baraarsha qixxeessini yannara boode uurrinshuwa lawishsha assine adhatenninna afansha aatenni haammata uurrinshuwa afansha uynoonniri faale harunsitanno gede hedatenniiti yee; baraarsha adhitinori mereerinni gibrinnu ministere Qamadete laalchi loossanni Afrikunni umikkita ikkatennino sa’e heewisamaano kaajjisha hasiissannota xawisino.
Baraarshu haammata Itophiyaho loosidhe galtinori daafurinna gumira uynoonni afansha ikkasi huwata hasiissannota coyi’re; Ministere xaa yannara maareekkisiissino seyoo woloottu wolootta laalchubbannino ledatenni Ahigurete deerrinni noose dhuka lossi’ra hasiissannota qummeessino.
Itophiyu Diilallote doogono hattonni Afrikunni albisa calla ikkikkinni kalqoomu deerrinnino heewisamaancho ikkase hedote giddo woratenni baraarsha uynoonnita kule; uurrinsha Koovid fayya taraawo yannara leellishshino kaajjille sufisiisatenni woyyaawa seyoo maareekkisiisa hasiissannota qummeessino.
Itiyo-Telekoomeno 75 miliyoone ale horonsi’raanonnaTelle-Birretennino 43 miliyoone owaatamaano kalaqa dandiitinota kayse; kuni loosi mite mite Afriku gobbuwa daga kiiro wo’munni wo’ma diwa dandaannoha ikkasi hawa dihasiissanno yiino.
Uurrinsha giwire baatate ragaanni ikko yannitte hayyo horoonsi’rate ragaanni Itophiyu lopho buuxisiissanni noota qummeesse; aanteet 120 miliyoone daga horaameeyye assate millissanna Afriku deerrinnino ledote loossa loosatenni seyoose roorenkanni lossi’ra hasiissannota huwachishino.
Baraarsha uynoonninsari mereerinni Itophiyu Poostu uurrinshano kisaarunni fulte tirfe afi’ranna kalqoomu deerrinni heewisamaancho ikka dandaase naade; hananfoonniha soorrote loosi kaajje sufa hasiissannota huwachishino.
Woluno seyoote baraarsha adhinohu Bayiriidi haaroo’mate kofo pirojekteno ubbinonkanni yee; soorrote kawa pirojektete massagaano, loosaasinenna ga’labbote wolquwanni ijaarshu loosi islanchimmatenninna olloha ikkino garinni loosamanno gede assa dandiinoonnita kaysino. Ijaarsha uurrisate babbaxxitino gano gannirono duuchanta jiffa sa’ne xaa yannara ijaarsha gumulate widira iillinoonnita egensiisino.
Baraarsha uynoonninsari ontenti uurrinshuwa qarunni soorrote kawa maareekkisiissino seyoo kaiminni calla ikkikkinni Afriku deerrinni noonsa seyoonni ikkinotano xawisino.
Uurrinshuwanna pirojektuwa massagaanono Xaphoomu ministirchi anganni baraarshanna afansha adhitinoha ikkanna; albillichono sufanno baraarsha ikkasi qumeessinoonni.
Amsaalu Felleqe
Bakkalcho Badheessa 5, 2016 M.D
