- Tayxe 6.5 biiliyoone chigginye kaansanni
Addis Ababa: Tayxe haanju harumi amuraatira 132 kume ali chigginyete mereershubba qixxaabbinota giwirinnu ministeere egensiissu. Tayxe 6 bixxille 5 biiliyoone chigginye kaasate mixi’noonnitano xawinsoonni.
IFDR Giwirinnu Ministeere kalaqamu jiro latishshi agarooshshiinna horoonshi qaru loosu gumulsiisaanchi Kalaa Faanoose Mekkonnin, Itophiyu Pireesete Uurrinshara xawisino garinni; tayxe haanju harumi amuraatira 132 kume ali chigginyete mereershubba qixxaabbeenna chigginye laashshinanni hee’noonni.
Tayxe haanju harumi amuraatira 132 kume 144 chigginyete mereershubba qixxaabbeenna chigginye laashshinanni hee’noonni yiinohu Kalaa Faanoose; amanyootunni gobboomu deerrinni 6 bixxille 5 biiliyoone babbaxxitino chigginyubba kaasate qixxaamboonni yiino.
Chigginyete mereershubba maamarratenninna mootimmate pirojekittubbanni irkisante dhuka lossidhanno gede loonsanni hee’noonnitano xawisino.
Tayxe diro kaasate mixi’noonni chigginyubba mereerinni 60 anga haammata horo nooseta ikkitanno gede xawisatenni; gattino 40 anga dubbu chigginye mereerinni 25 anga Abbay kofatto qooxeessira kaansannita qummi assino.
Haammata horo noonsari mereerinni gummaamma, saadate hayisso, leemmunna quchumu biinfilli haqqe afantanno; kurino chigginyete mereershubbara laashshinanni afammanni yiino. Dubbu horora hossanno chigginyubbano hattonni laashshinanni hee’noonnita huwachishino.
Gobboomu haanju harumi amuraatinni uminna layinki fooliishshonni 50 biiliyoone chigginye kaasate mixi’ne loonsanni hee’noonnita xawisinohu Kalaa Faanoose; sa’u onte dirrara 32 bixxille 5 biiliiyoone chigginye kaasate dandiinoonnita xawisino.
Aantanno sase dirra giddo gattinota 17 bixxille 5 biiliiyoone chigginye kaansanni gede qummi asse; isilaanchimmate widira dassatenni mixo gumulate qixxaawo assinanni hee’noonnita xawisino.
Hawadi amuraatira kalaqamunna waay agarooshshenna haanju harumi loossa loosantanno gede xawise; chigginyubba baattote ofollo kaima assitino kaashshu baattonna chigginyete mereershubba qixxeessate loosi loosamanni no yiino.
Kalaqamu jiro agarooshshi loosi qixxaawo, loosinna xaphishshu amuraati beehame diro wo’ma loosamannoha ikkinota xawisatenni; chigginyubbatenna chigginyete mereershubba qixxaawo halashsha hasiissannota ikkitinota qummi assino.
Dagoomu laayyotenna haanju harumi latishsha heewisamaanchimmatenni loosanni noo gedeno qummi assino.
Addisu Adoola
Bakkalcho Ammajje 28, 2016 M.D
