Addis Ababa:– Adiwu qeelle Itophiyu daga mittimma bowirte leeltino ikkitooti yaanni Federeeshiinete amaale mini songaafichi kalaa Agenyehu Teshaageri xawisi.
‘’128ki Adiwu qeelle qaaggo kolidda daga qeellera’’ yaanno adawarshinni Adiwu qeelle qaaggote sumudira ayirrinsoonni.
Federeeshiinete amaale mini songaafichi kalaa Agenyehu Teshaager ayyaanu aana sayisino sokkanni; Adiwu qeelle Itophiyu daga mittimma luphi yite leeltinota; massagaanchunna massagamaano mittoo’mitinota; mittimma ledante wolqaataame cigile kalaqqino ikkitooti yiino.
Adiwu qeelle tunsicho xawaabbaho; hattono kapho halaaleho soorrinoho yiinohu Songaafichu; aliidimmanna busha hedo hiiqqite taalleenyanna qeelama giwate arrishsho wo’mante kalqera fulte leellishshino qeelleeti yiino.
Adiwu qeelle Itophiyu kalqete xawira su’mise luphi yee leellino; Itophiyimma ayirrinyu woshshatto ikkitinota ikkase xawisatenni; qeelle borojjimmate giddo keeshshitinori kolidda daga sinqenna qodho ikkite wolaphonsara sharrantanno gede assitinnota coyi’rino.
Adiwu qeelle callimmate macciishshamme shitinota halaalenna mittimma kaajjado safo aana wortinota ikkase xawisinohu Songaafichu; qeelle kadote gashshaano koliddu aana noonsata sodhino laooshshe halaalaanchu taalleenyu dhaggera soorritino kalqoomu dhaggete ikkitooti yiino.
Tini qeelle, didandiinanni yaanno laooshshe hiiqqatenni mannu ooso taalleenya kalqete xawira leellishshinota ikkase qummeesse; kadote gashshaano aliidimma ammanantanno tunsichu yannara haaro halaale amaddino arrishsho Adiwu ilaalla guunxo aana warri yite fultanno gede assitinota coyi’rino.
Itophiyu daga massagaanchinsa woshshatto adhite sircho, amma’nonna afuu agawinsakkinni baalante gobbate qooxeessubbanni mittimmatenni gaadansa kayise; diinu wolqa Adiwaho ganatenni xaa yannara naaxxineemmo qeelle afi’ransa huwachishino. Adiwu qeelle wo’mante kalqe koliddu daga qeelle ikkite qaagantannota ikkase xawise; qeelle mittimmate guma ikkaseno coyi’rino.
Itophiyu daga Adiwu qeellenni dagate baxillenna roduuwimma rosatenni qansootu wolaphotenni heedhannota jiroo’mitinotanna dimokiraasete Itophiya gatamarate harinshora uminsa qeecha fultara hasiisannota qummeessino.
Tayxehu Adiwu qeelle ayyaani umisita borreessantino dhagge fushshite coyidhanno dhaggete qaaggo maareekkora ayirrisamasi baxxannoha assitannota qummeesse; maareekko techoo ilama gatamarantino safo huwattanno gede; dhaggete aana xiinxallo assatenni uminsa qeecha fultanno gede dandiisiissannota ikkase xawisino.
Hundi Itophiyi bareedda jannooti maamari pirezidaantichi Lij Daanieel Jotte isi widoonni; Adiwu qeelle Itophiyu daga mittu wodaninni ka’e kalqete dhagge soorritino qeelleeti yiino. Lij Daanieeli xawishshi garinni; Adiwu qeelle Afrka bebbeeqqate harinsho diigginotenna wolootano sharrote kakkayissino dandaate ayyaana kalaqqino ikkitooti.
Tayxe Adiwu qeelle ayyaana dhagge loosunni xawissanno basera ayirrisama baxxinoha assitanno yiinohu Lij Daanieel Jotte; ayyaanu hasaawunna gambooshshunni calla ikkikkinni dhagge xawissanno loossanno ayirrisama hasiissannohota huwachishino.
Adiwu qeelle qaaggote maareekkora Itophiyu daga shoolunku raginni gamba yitino qeelle leellishshannota ikkase qummeesse; qaaggote maareekko ijaarama wedellu ilama dhagge garunni xiinxallitanno gedenna bareendete ayyaani lophanno gede kaayyo kalaqannoha ikkasi xawisino.
Adiwu qeelle wo’mante kalqe kolidda daga qeelle ikkase qummeesse; qeelle qaaggote maareekko Paan-Afrikaanizimete sumudi Afriku daga mittimmanna sharro leellishshannota ikkase huwachishino.
Wedellu dhagge rosu mine, Adiwu qeelle qaaggote maareekkora rossanno yannara bareendete ayyaani lophannota xawisannohu Lij Daanieeli; woyyaawino Itophiya dagganno ilamara sayisate baalunku qeechasi fulanno gede qaagiissino.
Qiddist Gezzaheny
Bakkalcho Ammajje 28, 2016 M.D
