Boona Qawaallanka:- Booni gaangaawi woradi qaru quchumira Boona Qawaallankaho moola ishine garunni kayinsanni hayyubba ledo xaaddino mitiimmubba harancho yanna giddo tirate illachinshe loonsanni hee’noonnita quchumu Maazzagaaji mini egensiisi.
Uurrinshanke quchumaho millisse hasaawissino quchumu lophona latishshu millimillo towaattino.
Tenne yannara teessaano hasaawisate wo’naalloommoha ikkanna; quchumu teessaano mereerinni kalaa Aschaalew Ture, kalaa Binnoora Gaaxenna dukko Worqinesh Dawe hedonsa uyitinonkereeti.
Insano; Boona Qawaallanku quchumira baxxinohunni moola ishine tunganni base hoogasenni quchumu co’ichimma garunni agarantinokkita kayissino.
Ledoteno, quchumaho safote latishshuwa halashshate loossa xaa yannara hananfoonniri hee’rirono quchumu lopho buuxisiisate, hee’ratenna loosi’rate injiinoha assate safote latishshuwa halashsha hasiissannota qummeessitino.
Hedonsa uytinonke teessaano yitino garinni; quchumu co’ichimmanna lophora hasiisannore loosate ragaanni luphiimu qeechi mootimmanniha ikkirono; teessaanono mootimmate waatira ikkite teessaanchimmatenni agarranninsa qeecha fulate qixxaabbinotano kultinonke.
Teessaanote hedo kaima assatenni Boona Qawaallanku maazzagaajji loosu harisaancho kalaa Selemoon Ximqetu hasaawinsoommoha ikkanna; “quchumaho seeda yanna keeshshitinota dagate latishshu xa’monna hasatto kaima assatenni tayxe dirinni giddo doogga fanatenna halashshate, caabbichonna xalala anganni way xuruura diriirsate illacha tunge loonsanni hee’noonni” yaanni dawarino.
Kalaa selemooni, dagannita latishshunna danchu gashshooti xa’mubbara hasiissanno dawaro qolatenni quchuma hee’ratenna loosi’rate injiinoha assate baxxino garinni loonsanni hee’noonnita xawisinoha ikkanna;uurrinshankeno quchumaho towaattino garinni hanafantino safote latishshi loossa jawaachishshannota ikkaseeti.
Baxxinohunni, quchumu giddo moola ishine kayinsanni hayyo woyyaabbinokkita ikkasera teessaano kayissino hedo garaho yiinohu kalaa Selemoon Ximqetu; quchumaho konni albaanni moola ishine garunni kayinse tunganni base nookkita xawise, moola ishine garunni kayinse tunganni base hee’ra hoogasenni quchumu ishine keeshshino yee; konne qarra tiratenna dagate xa’mora hasiissanno dawaro qolateno muli yanna giddo boco miliyoone birrinni moola ishine kayinse tunganni baycho hirroommoha ikkanna; Doozeretenni umme base ishine tugate qixxeessinanni hee’noommo yaanniiti coyi’rinohu.
Quchumu co’ichimmanna latishshi daafira dagatenni ledo assinoonni hasaawinnino moola ishine anfiwa baala tugate ragaanni albinni woyyaawinori hee’rirono; xaano sae sae du’namaanchu sa’’anno diiche giddo tugate assooti noota qummeesse,togoo assooti ba’’anno gede dagano qotenke ikkito yiino.
Kalaa Selemooni xawishshi garinni; quchumaho moola ishine tunganni hayyubba ledo xaaddino mitiimmuba harancho yanna giddo tirate illacha tunge loonsanni hee’noonni.
Quchumu haaronna woyyaabbino pilaanenni massagamanno gede assateno dirritino pilaane garunni agarsiisate hala’ladunni loonsanni hee’noonnitano xawisino.
Wole widoonni, quchumu eono agarroonni garinni eote bu’a halashshatenni gamba assine hafanfarre nookkiha hasiisanno illachira calla hosiisate loonsanni hee’noonnitano Maazzagaajju mini loosu harisaanchi lede kaysino.
Quchumu xaa yannara 46 kume ikkitanno teessaano heedhaanoha hala’lado quchuma ikkanna; lamala qachinninna 41 bilookenni tantanaminota xawinsoonni.
Amsaalu Felleqe
Bakkalcho Ammajje 28, 2016 M.D
