-Dubbu horramme gargarate qoqqowu gede wodho qixxeessinoonni
Addis Ababa: Sidaamu qoqqowi tayxe diri 2016 M.D haanju haruminni 302 miiliiyoone dubbunna sagalimmate hossanno chigginye kaasate qixxaawinota egensiisi.
Sidaamu Qoqqowi qarqaru, dubbunna diilallote gadi soorro biilloonyi qaru Dayrektere kalaa Shittaye Yummura, Itophiyu Pireesete Uurrinsha ledo assino hasaawinni xawisino garinni; IFDR Xaphoomu Ministirchi Dokiter Abiy Ahimed, worino haanju harumi faasho garinni sa’u Shoole dirrara qoqqowu giddo haanja uddisiisate loosi kaajje loosamanni keeshshinota qaagiisse; tayxe 2016 M.D haanju harumi amuraatira biilloonyu hasiissanno qixxaawo assanni no yiino.
Qoqqowu giddo afantanno wo’mante woraddaranna quchummate gashshootira chigginye laashshate qixxaawo assinanni hee’noommo yiinohu Kalaa Shittaye; 2016 M.D haanju harumi amuraatira biilloonyu widoonni 146 miiliiyone dubbu haqqe chigginye kaasate qixxaamboonnita qummi assino.
Dubbu manchi beettirano ikko qooxeessu agarooshshira noosi horo haammatate. Keeraancho diilallo afi’ratenni hanafe xaginaatu geeshsha horo uytannono yiino.
Tayxe haanju harumi amuraatinni kaasate qixxeessinoonni dubbu haqqe mereerinni baadillicho haqqe waaddu, duguwu, duuwancho, hengeddenna woloottuno labbeemme dubbu haqqe afantanno.
Haqqe kaasa calla ikkikkinni kaansoonni haqqe shuqunne loossate looso loonsanni hee’noonni yiinohu biilloonyunnihu qara dayrektere Kalaa Shittaye; bashshoora haanju harumi loosi daafira dagate huwanyote anje mitiimma ikkite keeshshitino; xaa yannara kayinni haqqu aanno horonni dagate huwanyo lophitanni daggino. Kunino mixo gumulsiisate lowo injo ikkino yiino.
Sidaamu Qoqqowi giddo danimale dubbu horramme leeltanno gede qummi assinohu biilloonyu qaru dayrektere; konneno gargarate federaalete qarqaru, dubbunna diilallote gadi soorro biilloonyi lallawi kaiminni qoqqowu gede wodho qixxeessinoonnita coy’rino. Tini wodhono qooxeessu agarooshshiranna dubbu horramme gargarate lowo qeecha afidhino yiino.
Wole widoonnino 2016 M.D haanju harumi loosira giwirinnu biiro widoonni 156 miiliyoone sagalimmate hossanno chigginye kaansanniha ikkanna; qoqqowu deerrinni tayxe diro xaphooma 302 miiliiyoone sagalimmate hossannonna dubbu haqqe chigginye kaansannita afate dandiinoonni.
Tayxe 2016 M.D haanju harumi amuraati Dotteessu aganira hanafannotano kulloonniha ikkanna; niri haanju harumi kaashshi 85 anga ali muqaaqinotanna rumuxxinota biilloonyu egensiisino.
Jeefote sokkasinnino Kalaa Shittaye, 2016 M.D diri haanju harumi kaashshira daga baala hajo’yaati yite annimmatenni beeqqitara hasiisanno yee; kaasa callano ikkikkinni kaansoonni chigginye garunni fultanno gede shuqunanna toyaatano hasiissanno gede sokkasi saysino.
Addisu Adoola
Bakkalcho Ammajje 28, 2016 M.D
