Addis Ababa:- Xaphoomu ministirchi Abiy Ahimed (D/r) Keeniyahonna Tanzaaniyaho assino towaanyo gobbuwa miinjunni, wolqate shiqishonna qasiisote hobbaatinni noonsa xaadooshshe roorenkanni kaajjishannoha ikkasi xaphoomu ministirchi borro mini xawisi.
Xaphoomu ministirchi borro mini pirees sekiretariyate sooreette Billene Siyyum uytino xawishshinni; xaphoomu ministirchi Abiy Ahimed (D/r) Keeniyahonna Tanzaaniyaho assino towaanyo gobbuwa miinjunni, wolqate shiqishonna qasiisote hobbaatinni noonsa xaadooshshe roorenkanni kaajjishshannote. Towaanyo gobbuwate mereero noota dheggete xaadooshshe haaroonsitanno.
Xaphoomu ministirchi liuukesi ledo soojjaatu Afriki towaanyosi hanafinohu Keeniya Nayroobira ikkinota xawissinoti Billene; Keeniyu pirezidaantichi Wiliyaam Ruttonni mootimmate mine iibbado koyishsha assinoonnisi yitino.
Keeniyaho lamoomu hasaawa assinoonnita kayissinoti sooreette; xaphoomu ministirchi gobbate pirezidaantichi ledo assino lamoomu hasaawinni qoteho ministirootu ministirootu ledo hasaawa harissinota coyidhe; hasaawu Keeniyunna Itophiyu mereero nooha keeshshino xaadooshshe kaajjishanno yitino; baxxinohunni Keeniyu pirezidaantichi Haaro dooramaancho ikkasi ledo amadisiisame lamente gobbuwa massagaano mereero noo xaadooshshe kaajjishate kaa`litanno towaanyo ikkase kayissino.
Keeniyunna Itophiyu mereero wolqate shiqisho sumuumme noota buuxisse; tenne sumuumme gumaame assate Itophiyuwiinni Keeniya wolqate shiqisho assinanni xuruura xaphoomu ministirchi Abiy Ahimed (D/r) towaatinota coyidhino.
Billene xawishshi garinni; xaphoomu ministirchi Abiyinna pirezidaant Rutto lamoomu hasaawinsanni dhaggete kaiminni kayisse xa noo akatubba geeshsha hasaabbino. Konninnino qasiisote aana keerenna hobbaate hattono gutu latishsha kaajjishate ragaanni haammata hedubba kayissino.
Roorenkanni kaajjinshe loosa hasiissanno handaarra aanano sumuummete aana iillitino yitino.
Xaphoomu ministirchi Keeniyu towaanyosi jeefisihu gedensaanni Tanzaaniya Dareselami ha`rinota xawissinoti Billene; hatte gobbara ha`rinohuno pirezidaantitte Saniya Suhulu towaanyote xa`mo garinni ikkinota coyidhino.
Xaphoomu ministirchi Abiy Ahimed Dareselam iilli yannara iibbado koyishsha assinoonnisita kayisse; pirezidaantittete ledo babbaxxitino hajubba aana hasaawa assitinota xawissino.
Pirezidaantitte Saniya Suhulu xaphoomu ministirchi Abiy Ahimed ledo assitino lamoomu hasaawinni ledotenni liuuke gaamo ledo hasaawa assinotano xawissino.
Assinoonni hasaawubbannino Tanzaaniyunna Itophiyu dhaggete xaadooshshensa kaajjishate sumuu yitino yitino.
Mitte yannara Tanzaaniyunniti diilallote wolqa jifantanna Itophiyunniti diilallote wolqa gargartinota lawishshunni kayisatennino; PAN Afrikaniizimetenni noonsa xaadooshshino Juliyes Nererenna Atse Hayilesillaasehunni hanafannoha ikkasi huwachishshino. Kunino lamente gobbuwara gumaamo xaadooshshi hee`rannonsa gede xinta ikkino yitino.
Xaa yannarano Itophiyu Tanzaaniyu ledo daddalunni xaaddannota ikkaseno buuxissino.
Itophiyu loossanno miinju woyyeessote loossa ledo Tanzaaniyu addi xaadooshshi nooseta buuxisse; lawishshahono lamenti gobbuwa gibirinnu woyyeesso loossanni, shiilote, turizimetenna wolootta handaarra aana uytanno illachi mitto lawisannonsata coyidhino.
Pirezidaantitte Saniya xaphoomu ministirchi Abiy qasiisote ge`nera assanno qeecha kayisse afamishsha uytinotano Billene buuxissino. Ledotennino pirezidaantitte xaphoomu ministirchi Itophiyu miinja lossate assanno wo`naalsha maala`litino yitino.
Haanju harumi aana mitteenni loosate hasaabbinotano sooreette xawissino.
Xaadooshshubba roorenkanni lifixisate hasaawu gedensaannino sumuummete sanadda malaatissinota egensiissino.
Budunna seesiqalote ragaannino kalqoomu filmete industire goshooshate; giwirinnu handaarinni baxxinohunnino ICT gummanni handaaraho kaa`lo ikkanno garinninna iibbille dandiite uurritanno qamadete laalchubba aana hattono wolqate shiqishonna hidhote handaarinni sumuumme malaatisinota Billene egensiissino.
Xaphoomu ministirchi Abiy Tanzaaniyaho albi pirezidaantichi Ali Huseeni reyo korkaatinni macciishshaminosi dadille pirezidaantitte Saniyaranna baalunku Tanzaaniyu dagara saysino.
Abbebech Maatewoos
Bakkalcho Ammajje 28, 2016 M.D
