– 49 daaimu rosi minna loosantino
– 39 haruudde maxaaffate minna gatamarantino
Addis Ababa:- Sidaamu qoqqowira sa`u 6 aganna giddo harinsoonni roso ilamate millimillonni babbaxxitino bissanni 432 miliyoone birra ale irko gamba assa dandiinoonnita xawinsi.
Sidaamu qoqqowi layinki pirezdaantenna rosu biiro sooreessi kalaa Beyyene Baraasa Itophiyu pireesete uurrinshara egensiisino garinni; woxu bikki millimillo hanaffunkunni kayse danunninna wolqatenni assinoonni irko mitteenni amaddinote.
Qoqqowoho konni albaanni rosu haaroonshi pirogiraame diriirsine uurrinshu eote buicho heedhanno gedenna rosu islanchimma agarsiisa dandiissanno loossa loonsanni keeshshinoonnita sooreessu qummeessino.
Rosu ilamate millimillo gobboomu deerrinni hananfihu gedensaannino millimillote loosi qoqqowu pirogiraame ledo qineessine sunfoonnita coyi`rinohu sooreessu; 2015 M.D maaju aganinni hananfoonni millimillonni qoqqowoho babbaxxitino dureeyye umonsa dandiite haruudde rosu minna ijaarsa dandiitinotano egensiisino.
Sorreessu xawisinte gede; millimillotenni 49 ikkitanno daaimu rosu minna baadiyyete qooxeessubbara gatamara dandiinoonniha ikkanna; mittu dureessi callichosi ikkatenni haaro layinki dirimi rosu mine gatamara dandiino.
Gatamarshu harinshonni 273 haaruudde ronsanni kifilla loosantinoha ikkanna; 3 kume 770 ikkitanno kifilla qole haaroonsinoonni. Ledotennino 39 haaro maxaaffate minna gatamarantinoha ikkanna; 248 albi maxaaffate minna haaroonsinoonni; 34 haruudde way furchubbano diriirsa dandiinoonni.
Haruudde loonsoonnirinna albi rosu minna aana gatamarantinore lede 297 haaro rosaanote shumate minna loosantinoha ikkanna; 240 ikkitannore haaroonsinoonni. Gatamarshu loosi ledotenni rosu waacubbano Uduunne/ wonshate loosi loosaminota buuxisinohu biirote sooreessi; qoqqowu hidhe shiqishinoha lendikkinni millimillotenni calla 13 kume 619 rosaanote barcimma dagate beeqqonni rosaanote iillitanno gede assinoonnitano xawisino.
36 kume barcimma haaroonsha assineennansa rosaano horonsidhanni afantannoha ikkanna; haruudde kolishsho saleeddate hidhonna albire haaroonsate hattono wolootta haammata loossa loosantinota sooreessu coyi`rino.
Millimillotenni sa`u 6 aganna giddo rosu minna akata soorra dandiinoonnita buuxisiisinohu sooreessu; sa`u 6 agannara loonsoonninna afi`noonni guma keenatenni amandoonni diru goofimarchi geeshsha millimillo harisate ragubba worre looso sunfoonnitano egensiisino.
Aanteteno millimillotenni rosu minna akata soorranna rosaanote gumi aana soorro abbate raga worre dagooma qineessate looso sunfannitano huwachishino.
Rosu gummaamimma bikkinannihu rosaanote gummaamimmanniti yiinohu kalaa Beyyene; rosaano rosinsanni gumaamma ikkitannohu rosu minnansa biifadonna injiitinota ikkitanno woyteeti yiino.
Hanafantino millimillo rosaanote gummaamimmaranna rosu handaara woyyeessate amandoonni mixora qara ikkitinota xawisino.
Millimillo mitte higge hanafante uurritannota ikkitukkinni sufo noosete yaatenni dagoomu rosu handaarira assanni noo irkonna beeqqora galate handaaru haaroo`mara dagoomu beeqqo kaajjishe sufanno gedeno xa`mino.
Abbebech Maatewoos
Bakkalcho Ammajje 21, 2016 M.D
