Addis Ababa:- “Maatete Jireenya Baalunkura” yaanno uminni Sidaamu qoqqowira maatete Jireenya buuxisiisate wo’ma wolqanni loosu giddora eate hajo la”annonsa bissa baalanti noowa hasaawa harinsoonni.
Qoqqowu pirezidaantichi kalaa Desta Ledamo tenne yannara xawisino garinni; dagate hasatto badatenni 10 diri mixo mixi’ne 5 dirita bande loosu giddora eatenni; doogote latishshi, xalalu anganni way tuqishshi, rosu minna halashsha, fayyimmate uurrinshubba ijaarsa, keerenna ga’labbo bowirsa hattono wolootta handaarrara illacha tunge loosatenni danchu gumi maareekkamino.
Annu annunna maatete heeshsho woyyeessate assinoonni xiinxallonni 2014M.D hananfe maatetenna hallanyu Jireenya buuxisiisate jirsa tunge loonsanni hee’noonnita huwachishinohu pirezidaantichu; noonketa jirote dhuka baala horoonsi’ne maatete Jireenya buuxisiisate illachunni loonseemmo yiino.
Sidaami garinni daga ruukkado baattora heedhannoha ikkasinni; rosantinno loosi’rate hayyonni fulle noonke shiima baattora saadate latishshi handaarira bobbankiro horaameeyye ikka dandiinannita bande, sircho woyyaabbino saada dagoomaho iillishatenni horaameeyye ikkitanno looso loonsoonnihunni danchu gumi maareekkamasi kulino.
Diilallote akata badatenni baalunku handaarinni loosu giddora bobbaaha hasiissannohura massagaano baalanti kakkaooshshu paakeejubba aana illacha tugge loosa agartannotannota coyi’rino.
Qoqqowi Jireenyu Paarte Sinu Borro Mini Sooreessi Kalaa Abrihaami Maarshaallo isi widoonni; Itophiyu konni albaanni borojjimmate hirantukkinni xaa geeshsha keeshshitanno gede albi annuwi fultino qeechi naaxisannoha ikkirono; buximate giddo hee’ranke haxonke heeshshi assitanni keeshshitino yee; dagate maatetenna halanyu Jireenya buuxisiisatenni dhaggeeffantanni looso loosa agartannota coyirino.
Mootimmano mixo fushshite loosu giddora e’urono paarte kayinni duuchante tantanora afantanno massagaannora irkonna harunso assate looso loossannota huwachishino.
Gutu Jireenyira leellinshummo loosu gumulo maatete Jireenyinnino leda hasiissanno yiino.
Qoqqowu Mootimmate Komunikeeshiine Hajubba Biiro Sooreessi Kalaa Woseniyellehi Simiooni assino hasaawinni; maatete Jireenya buuxisiisate haja hee’ranna hoogate looso ikkase kule; loosantanno hiittenne loossano miidiyu loosinni irkinse dagate faajje assa agarrannita kulino.
Gaazeexu Odeessaanchinni
Bakkalcho Ammajje 21, 2016 M.D
