Addis Ababa:- Afriku mittimma gobbuwate giddo kalaqantanno kiphuwa uurrisatenna keere buuxisiisate loosantanno loossa kaajjishshe sufannota haaru Afriku mittimma komishiine murrinshi xawisi.
Haaru Afriku mittimma murrichi Moritaaniyu pirezidaantichi Mehammed Aweld Gazwahani 37ki Afriku mittimma massagaanote songo jeefo amuraati aana coyi`rino garinni; massagaano keeshshonsanni ajanda 2063 umiha tonnu diri gumulsha keenatenni aantino tonnu diri mixo aana hasaabbino.
Sa`u yannubbara baxxinohunnino keere buxisiisate, mannihimmate qoosso agarooshshe, danchu gashshootinna ammansiisanno sufote latishsha buuxisiisate ragaanni dancha soorrubba borreessantino yiinohu murrichu; kuri sufisiisatenni keere dirrisatenna kiphuwa gatisate hattono Afriku gobbuwaha daddalu xaadooshshi gumaamimma buuxisiisate loonsannita xawisino.
Tayixe massagote hedo garinnino Afrikaho 21ki sanira injaanno islanchimma noosi rosu tuqishshi buuxamanno gede loosa agartanno yiino.
Ledotennino Afriku kalqoomu deerrinni noose adhamooshshe kaajjishatenna halantino mootimmuwa ga`labbote amaale mine uurrinshu ofollo heedhannose gede assate; hattono uminke qarrubbaranna xaaddannonke mitiimmubbara uminke mala uurrinshanke widoonni shiqinshiratenna gumulate loosa agartannota ikkitanno yiino.
Songo “21ki sanira injaanno Afriku rosiisa; kaajjado rosu amanyoote kalaqatenni Afrikaho hanqafaancho, heeshshote diri, islanchonna gara ikkino rosu tuqishsha halashsha” yaanno massagote hedonni hadhanni keeshshitinota qaangannite.
Abbebech Maatewoos
Bakkalcho Ammajje 14, 2016 M.D
