Addis Ababa:- Sidaamu daga bude, Afoo, dhagge, balchoomanna hornyubba leellishshanno gede hende loonsoonniti “Affini” filme Sidaamu budu harira maassiinsoonni.
Maassote amuraati aana leelle hasaawa assinohi Sidaamu qoqqowi pirezidaantichi kalaa Desta Ledamo coyi’ranni; “ Affini” mimmito ayirrisanna macciishshamate hornyi noosi dimokiraasete harinshooti yiino.
“Affini” gaance ajishanno, beeqqaanchimma noosiho, ga’labbi yiino dagoomi hee’ranno gede assannota kaysinohu pirezidaantichu; konne ha’nura bude albi annuwi agarte ilamate ragissanni keeshshitinota coyi’rino.
“Affini” muxxe gobbate jiro ikkasi xawise; annuwu hundinni agartenna ayirrisse tareessitanni dagginoha konne naaxxisanno hornya xaa ilamano seekkite afanna agarte keeshshiisha noonsata huwachishino.
Qoqqowu Budu, Tirizimenna Ispoortete Biiro sooreessi kalaa Jaggo Agenyehu isi widoonni; fileme Sidaamu dagaha addi addi budu jirtuwanna hornyubba amaddinonna xawissannota ikkase kule; dagoomunni xaphooma heeshshote garanna qoqqowunniha kalaqamu gara leellishshannota coyi’rino.
Filme, Sidaamu daga araarunna gaance tirate ha’nura amanyooti aana illachishshinota ikkaseno lede xawisino.
Affini Filme aantete addi addi Sinimu minnara leellinshanniha ikkannotano maassote aana buunxoonni.
Gaazeexu Odeessaanchinni
Bakkalcho Ammajje 14, 2016 M.D
