Addis Ababa:- Baincho assootenna jirote hafanfarre gargarate assinoonni sharronni mooramino mootimmatenna dagate jajja gatisa dandiinoonoonnita Sidaamu qoqqowi Pirezidaantichi kalaa Desta Ledamo xawisi.
Pirezidaantichu tenne xawisinohu,qoqqowu amaale mini sa`u lamala 6ki doycho 3ki loosu diri 6ki uurrinshu songo harisi yannara shiqishino ripoortenniiti.
Kalaa desta tenne hattenne yannara, baincho assootenna jirote hafanfarre gargarate illacha tunge assinoonni sharronni mootimmatenna daganniha ba“noha lowo jajja gatisanna qolsiisa dandiinoonni;hattonobainchu assootinninna moorunni huluullammoonni bissa aana xamamooshshe buuxisiisate kaajjadu garinni sharrammanni heenoonni.
Bainchu loosi dagate jironna latishsha soqannoha ikkasinni qoqqowu mootimma konne assoote gargarate illacha tugge loossannotano buuxisino.
Pirezidaantichu; qoqqowu baajeetenni loonsanni pirojekitubba desketenni harunso assatenni pirojekitubba amandoonni yanna giddo islanchimmaseno agarte gooffe dagate horo uyitanno gede kaajjado harunsonna keenote amanyootinni woyyaambe dagganno gede assinanni hee`noonnitano xawisino.
Ledotennino halamooshshu hanqafote loossa gumaamimma woyyeessate buxima ajishshanno handaarrara balaxo uyine konni dirita baajeettete beehache assine sa`noonnitano qaagiissinohu pirezidaantichu kalaa Desta; mootimmate fayinaansenna gashshootu qorqorshu loossanni qoqqowu mereershira uurrinshu loossara konni 6 agani giddo 464 miliyoone birra Federaaletenninna giddoydinni gamba assinannihunni sayisa hasiissanno biirora sayisate mixi`noonnihunni 435 miliyoone mixotenni 95 anga ikkanno womaashsha sayinseenna loosu aana hosinotanna hosanni nootano buuxisino.
Kaapitaalete loossarano Sadaasu geeshsha 1.17 miliyoone birra fulo assine baantoonni yiino.
Woraddate gashshoottara damoozahonna uurrinshu loosira 3 biliyoone 230 miliyoone sayisate mixo assine 3 biliyoone 3 xibbee miliyoone mixotenni 102 anga ikkannoha sayinsoonnita ripoortesinni xawisino.
Hegeraame latishshu lophora SDG yinanni fulora federaaletenni daanno woxe 287 miliyoone 6 agani giddo sayisate mixi`ne 79 anga ikkannoha afi`ne sayinsoonniha ikkanna; gatinohuno aante aantetenni daannota pirezidaantichu buuxisino.
Shoolente zoonnarano 62.6 miliyoone birra sayinseennano loosu aana hosinota buunxoonnino yiino.
Daganke latishshunninna danchu gashshootinni horaameeyye assate loossa kaajjite suffannotano pirezidaantichu egensiisi.
Abbebech Maatewoos
Bakkalcho Ammajje 14, 2016 M.D
