Addis Ababa:- Gobbate bayirroonyiranna gashshootu mittimmara lubbote kakkalooshshe baattino jannooti wulata qollannihu keerunna latishshu bareeda ikka dandiinirooti yte Addis Ababu quchumi gashshooti kantiiwitte Dukko Adaanech Abeebeti xawissu.
87ki ammajje 12 kakkalamaano qaagooshshi ayyaani Addis Ababaho lee kiilora afamanno kakkalamaanote sumudira babbaxxitino qixxaawubbanni oyimbarra ayirrisamino.
Addis Ababu quchumi kantiiwitte Dukko Adaanech Abeebeti barraho coyidhino garinni; gobbate bayirroonyira kakkalooshshe baattino jannooti wulata qollannihu keerunna latishshu bareeda ikka dandiinirooti.
Itophiyu techoo dana amaddinohu hedeweelcho ikkikkinni baca amuwanna annuwa mundeenna miqicho baatteennaseeti yitinoti kantiiwitte; konne wulate qolate dhagge kulate gobbaanni mittimmatenna latishshaho gutunni uurra hasiissannota coyidhino.
Dukko Adaanech Abeebeti leddeno; albi annuwanna amuwa mittimmatenninna gutunni uurransanni techo wolaphotenninna naaxxillunni hee`neemmo gede assitinonke yitinnoha ikkanna; haaro ilamano tenne dhagge latishshunninna mittimmatenni ledatenni sufisiisa hasiissannonsa yitino.
Dukko Adaanechi xawishshi garinni; albi lubbote kakkalamaanonni ammajje agani Itophiyaho haammata heeshshote kakkalooshshe baantoonnihonna kalqete barera taalloonyenna wolapho dudubbara dandiitanno qeelle afi`noonni aganaati. Konne kaima assatenni beroo techoohunni, techoo ga`ahunni ledo xaadissanno balchoomma luphi asse gatamaratenni haaruudde dhagge loosa qara ikkitinota xawissino.
Bero gobba gatamarantinohu mittimmatenninna gutunni ikkinota huwatatenni kaajjishate murciraanchimmatenni loosa hasiissannotano Dukko Adaanech coyidhino.
Annuwatenna amuwu sharronni afi`noommo naaxxillinna wolaphonke wo`ma ikkanno gede gobba latishshunni jiroonsa hasiissanno yitinoti kantiiwitte; ledotennino dhagge kulate gobbaanni ga`a qaanganniha meessi sumuda wore sa“a hasiissanno yiteno xawissino.
Hundi Itophiyu jannooti bareeddate maamari pirezidaantichi Lij Daanieel Jotte isi widoonni; kakkalamaanote ayyaani qoogooshshi barra ayirrinsanni woyte sa`ino mada qaagatenni rabbate ka“a ikkikkinni; ilama harumansa harunsatenni latishshunninna mittimmatenni Itophiya sufisa dandiitanno gede ikkinota buuxisino.
Itophiyu daga Xaaliyu horro effidhe giwatenni assitino sharronni Adiwu olinni qeelaminohu faashistete oli rabbate ka“atenni Itophiyu daga aana luphiima raafata gumulinota qaagiissino.
Ayyaanunnihu dhaggete tiro hattono afi`noonni qeelle may korkaatinni ikkino gede haaro ilamara huwachisha baalunkuwiinni agarrannitano Lij Daanieel qummeessino.
Adiwu qooggo pirojekte Itophiyu gashshooti mittimmaranna bayirreenyaho mundeetenninna miqichinsanni kakkalooshshe baattino annuwaranna amuwate hasiisanno ayirrinye uyitannote yiinohu Lij Daanieel; baalunku Itophiyu daga babbadamooshshe badhera aguratenni keerehonna mittimmate halamanno gede woshshatto assino.
Ammajje 12/1929 M.D jannootu bareedda Abiriha Debocahunna Moges Asgedoom faashiistete horra effidhe giwatenni fantino bombu gawajjonni faashiist Xaaliyu olu massagaancho ikkinohu Marshaal Rudolfo Giraaziyani madirasi korkaatinni 30 kume ale Itophiyu daga barshetenni lubbantinota qaangannite.
Abbebech Matewoos
Bakkalcho Ammajje 14, 2016 M.D
