Addis Ababa:– Itophiyu diilallote gade soorro gargadhate haanju sumudinna arri qamadenni gumultinohu gummaamu loosi Afrikaho rosicho ikkannota IFDR pirezidaante sahileworq zewudeti egensiissu.
37ki Afriku mittimma massagaanote gambooshshira qote qoteho Itophiyu qixxeessino luphiima gibrinnu hasaawu bare “Afriku sagaletenni umosi dandaanno” yaanno massagote qaalinni Adiwu qeelle qaaggo harinsoonni.
Tenne yannara pirezidaant Sahileworq Zewudeti xawissino garinni; Itophiyu diilallote gade soorro gargadhatenna haanja sumudanna arri gorsa gumulasenni illete leellino guma borreessiissino. Kunino Afriku sagalete wowe buuxisate loossanno loosira rosichonna lawishsha ikkannoho.
Itophiyu sa’u Onte dirra giddo haanju sumudi mixo gumulasenni diilallote gade soorro danqartino gawajjo gargadhate aleenni laalchonna laalchimma lossidhino yitino.
Baxxinohunni arri gorsinni umiseta qamadete hasatto wonshi’ratenni aleenni gobbayidi dikkora shiqishate dandaase qummi asse; haanju sumudinnino dubbu jiro lossatenni ledote laalchonna laalchimma lossa dandiinoonnita xawissino.
Baxxinohunni Itophiyu qamade gobbayidinni eessatennni fulte gobbayidi dikkora shiqishshanni afantanno rosichi Afrikahono beeha dandiitannoho yitinnoti pirezidaantitte; Afrikuno Itophiyunni roso adhe diilallote gade iillishshanni noo xiiwo gargadha hasisisannosi yino.
Gobba sagalete wowe buuxisate gibrinna yannaasincho assatenni diilallote gade soorro gargadhate haanju sumudi mixo gibrinnu latishshi ledo mittoonsatenni loossanni afantanno yitinno.
Taalinoha sagalete amanyoote gumulate maatete jireenyi aana illacha tungoonnita kayisse; gobbuwa Itophiyunni rosicho adhite Ahigurennita sagalete wowe buuxisate mitteenni loosa hasiissannonsata huwachishinno.
Afriku gibrinni 90 anga xibbuunni ikkannohu xeenu aana safaminoha ikkasi xawisse; gibrinna yannaasincho assatenna waayi aana safaminoha gibrinnu latishsha harisate xaano illacha tuga hasiissannota coyidhino.
Diilallote gade soorro Ahigurete gibrinni aana hekko ikkitinota kayisse; safote latishshi wo’ma hooga, womaashshu shiqisho anjenna wolootu mitiimmubba sagalete wowe buuxisate xiiwo kalaqqinota qummeessitinno.
Afriku gibrinna yannaasincho assatenna lossate xiinxallotenni ikrisantino irkonna harunso hasiissannotanna poletiku murciraanchimma xa’mannota gambooshshu aana kayinsoonni.
Ahigurennita sagalete wowe buuxisate halamate yanna tenne ikkitinota massagaanonna ogeeyye huwata hasiissannonsata coyidhino. Konnirano sufo noota gibrinnu istiraateeje gutu ajuuja, egenno, halantino sharronna jiro qineessine loosa hasiissannota xawissino.
37ki Afriku mittimma massagaanote gambooshshira qoteho Afriku sagaletenni umosi dandaanno akati, diilallote gade soorrora malanna sagalete amanyooti soorro gutu qaafo gumulama hasiissanno mixo aana illachishino hasaawa Adiwu qeelle qaaggo Paan-Afriku harira harinsi yannara Pirezidaant Sahileworq Zewudetinna Chaadi xaphoomu ministirchi Sekses Marsani lendanna ministirootunna wolootu kalqoomu uurrinshuwa riqiwamaano hattono jajjabbu handaaru ogeeyye afantino.
Qiddist Gezzaheny
Bakkalcho Ammajje 14, 2016 M.D
