Yirgaalame:- Amandoonni 2016 baajeettete dirinni Sidaamu qoqqowira shoolente zoonnara loosantanni noota babbaxxitino latishshu loossa qoqqowu amaalete mini miillanni sa’u muli barribba giddo towaanyo assinoonni.
Towaanyote beeqqaano ikkitinori mereerinni Qoqqowu Amaalete mini miilinna Komunikeeshiinete Biiro Sooreessi Kalaa Woseniyelleh Simiooni coyi’ranni; Sidaamu qoqqowo ikki kawa dagannita latishshunna danchu gashshooti xa’mubbara dawaro qolate loonsoonni loossa yanna yannantenni keenanni dangoonnita xawisino.
Xaa yannarano amandoonni baajeettete dirinni sa’u lee agannara mixi’ne gumulloonni loossa keenate dandiinanni garinni basete geeshsha ha’ne towaanyo assine la’noonnita kulinohu kalaa Woseniyelleh; la’ne buuxate dandiinoonni garinni qoqqowoho danchu loosi loosamanni afamannota coyi’rino.
Amaalete mini miillahu qaru loosi daga wodhitino mootimma loosu iima hee’rase woy loossanni nookkita buuxate yiinohu kalaa Woseniyelleh; konni kaiminni, xaa yannara qoqqowu deerrinni loosantanni noota duuchu handaari latishshu loossa keenate harinshonni mitto ikkinoha towaanyo assinoonnita xawisino.
Sooreessu xawishshi garinni; gobbomu deerrinni agarranni lopho abbate dandiisiissannore yine bandoonniri Gibrinnu, Manufaakcheringenna Industire, ICT, Shiilonna Daa’’atto ikkitanna; kuri jajjabba lophote heellichubba garunni loosu aana hosa dandiituro qansootaho loosu kaayyo kalaqantanno; lopho dagganno; buximatennino fula dandiinanni.
Sidaamu qoqqowi deerrinnino tonnu diri mixo qixxeessine loosu giddora e’noonnita kayse; tenne mixo diru dirunkunni loosu widira soorrinanni hee’noonnitanna, xe’nenna laanfe leeltuwa yanna yannantenni keennanni hee’noonnita qummeessino.
Mootimmate mixo loosu aana hossinota buunxannihu loossa dagate ledo keenatenniiti yee; daga riqibbinoti amaalete mini miillano mootimma amaddino mixo garunni gumulantanni noota buuxxino yee hedeemmo yaanniiti coyi’rinohu.
Diru dirunkunni xa hananfoonni garinni latishsha halashsha dandiiniro aantanno yannara Sidaami giddo buxima huna dandiinannita kaysino.
Towaanyotenni gibrinnu handaarinni laalchimma lossate, wedellaho loosu kaayyo kalaqo, xalalu anganni wayi shiqqo, fayyimmatenna rosu handaarranni hattono babbaxxitino safote latishshuwa illachunni la’noonnire ikkansano kalaa Woseniyellehi lede qummeessino.
Yaareed Geetaachew
Bakkalcho Ammajje 7, 2016 M.D
