Addis Ababa:- Gobboomu deerrinni rosu minna deerra woyyeessate dagoomu beeqqo kaajjishatenni jawa illacha tunge loonsani hee’noonnita Rosu ministere egensiissu.
Rosu ministirchi Pirofeeser Birhaanu Negga uyno xawishshinni; rosu minnara safote latishshuwanna rosu isilanchimma woyyeessate xaa yannara dagoomu ledo halamme loonsanni hee’noonni.
Sai dirira xaphoomunni 49 kume ikkitannoti mootimmanniti uminna layinki dirimi rosi minnara safote latishsha wonshate xiinxallo shiqinshoonnita xawisinohu Ministirchu; konninni, 6 rosi minna calla 4ki deerra wonsha dandiitinota kulino.
Assinoonni xiinxallonni xaphoomunni rosu mini deerra wonshiritinoreeti yine bandoonniri 0.02% callate yiinohu Rosu ministirchi pirofeeser Birhaanu; 4ki deerra wonsha dandiitinori caabbichunna way, biifado ikkino qaaqquullu godo’litanno bayichi, co’itte kifillanna hattono mitte kifile giddo 40 rosaano calla rossannowa amaddino boode rosi minna ikkansa kaysino.
1ki hattono 2ki deerrira noori kayinni rosu minnaati yinannikkire ikkansanni kuri rosi minna woyyeessate jawa mini looso hasiisanno yee; 3ki deerrira noori woyyaawa hasiissannonsare ikkansa coyi’rino.
Rosu minna deerri woyyaawa hoogasinni gobboomu deerrinni rosu isilanchimma woyyeessate assinanni wo’naalshi gufi’rannokki gede jawa soorro abba hasiissannotano qummeessino.
Rosu handaarinni soorro hendanni woyte balanxe loosa hasiissannohu rosaano tashshi yite rossannowa rosu minna akata soorratenni woyyeessa agarrannita xawisino.
Ministirchu xawishshi garinni; sai hawadi yannara gobboomu deerrinni ‘’Roso ilamate’’ yitanno millimmo kalaqatenni dagooma beeqqaano assine loonsoonni hala’lado loossanni xaa geeshsha 11 kume 611 rosi minna wo’munni wo’ma gatamarantino.
Kuri rosi minna Wayinna caabbichu hee’rannonsa gede assinoonni. Hala’ladu bayichi noonsarino Irshu bayicho laashshitanno gede hanafisiinsoonni yiino.
Sai hawadi yannanni hanafe ‘’Roso ilamate’’ yitanno millimillonni noota rosu minna gatamara calla ikkikkinni 4 kume 871 haaruudde rosi minna ijaarroonnitano egensiisino.
Kuri giddonni 3 kume 180 balaxote rosi minna; 1 kume 390 umi dirimi hattono 295 layinki dirimi rosi minna dagate beeqqonni ijaarantinota kaysino.
Handaarunni dagooma beeqqaano assatenni loonsoonni loossanni jawa jawa soorro dagginota xawisinohu Ministirchu; konni garinni hanafantino loossa kaajjinshe sufisiisa dandiiniro rosu handaarinni agarranni guma danchu garinni maareekkisiisa dandiinannita lede coyi’rino.
Amsaalu Felleqe
Bakkalcho Ammajje 7, 2016 M.D
