Addis Ababa:- Loossannotinna jawaattanno anga gobba soorritannota Jigjigu quchumi leellishanno yee xaphoomu ministirchi Abiy Ahimed (D/r) xawisi. Xaphoomu ministirchi Abiy tenne lamala giddo Somaalete qoqqowira babbaxxitino latishshu loossa towaatino.
Xaphoomu ministirchi Abiy Ahimed (D/r) tenne yannara; towaanyo baca rosicho afi`noonnita ikkase buuxise; loossannotinna jawaattanno anga gobba soorritannota Jigjigu quchumi leellishanno yiino.
Somaalete qoqqowi soojjaatu ragaanni gobbatenna olluu gobbuwara jawa dikkote mereersha ikke owaata dandaannota leellishshannoho yiinohu xaphoomu ministirchi; xaphoomunni Somaalete qoqqowira afi`noonni keerinninna gashshootu assino wo`naalshinni luphiima ikkino miinju kakkaooshshi leellinota xawisino.
Qoqqowu safote latishshi ijaarshi, gibirinnunni, fayyimmatenni, rosunni, eotenninna baajetetenni lopho leeltanni noota kayise; kuni loosi kaajje sufa noosita raga worino.
Somaalete qoqqowira hanafantinoti latishshu loossa daafurrummoro, loonsummoro, jawaantummoronna keerenke buuxa dandiinummoro harancho yanna giddo mannunniha heeshshote deerra luphi assa dandiinannita leellishshanno yee coyi`rino.
Xaphoomu ministirchi xawisino garinni; sase dirrara albaanni Jigjigu lamalanna sette kiilomeetire dibbannoti mitte asfaaltete doogo noosi quchumaatinkanni. Xa kayinni 40 kiilomeetire ale dibbannoti kaameelu, shalleettetenna lekkaanote doogo ijaarshi jeefote aana no. Doogote ragaanni Somaalete qoqqowira 2 kume kiilomeetire xe`inokki doogo ijaarranni hee`noonni.
Sa`u sasenna shoole dirra giddo Soomaalete qoqqowira 68 quchummanna haammata woradda 24 saate caabbicho afidhanni nootano egensiisino.
Fayyimmate handaarinnino soorrote albaanni qoqqowoho honse hopitaalla calla noonkanni; soorrote gedensaanni kayinni 11 ijaarroonni yiinohu xaphoomu ministirchi; Jigjigaho la`nummoti jawanna duuchanka coye wonshinoonnise hospitaale olluu gobbuwarano owaante uyitannote yee huwachishino.
Hallanyu handaari quchumu giddo ijaarsanni noo ijaari, minnate ijaarshinna xaphooma quchumu miinji millimmillo loosu kaayyo noota leellishshanno yiinohu xaphoomu ministirchi; kunino qoqqowu ikkado mootimma ikke manna owaata dandiisannosi dhuka kalaqanni noota leellishanno yiino.
Jigjigu quchumira aantete baca haqqe kaasa, qooxeessa co`isanna dizayinete gobbaanni noo minna biddi assa hasiissannota qummeesse; kuni ikkiro Jigjigu aantanno ontenna tonne dirrara doorshu qara quchuma ikka dandiitannota xawisino.
Towaanyosinni haaroonsate looso gumulloonniseta Jigjigu Sheh Hasen Yaabaare riferaalete hospitaale, Shebele zoone Berano woradira latanni nooha girsu latishshi looso, haaro amaalete mini ijaaranna layinki doyichoha Jigjigu quchumi xalala anganni waay piroojekite loosu millimillo la`noommo.
Somaalete qoqqowira Gode quchumira haaro ijaarroonniha Ugaas Miraadi horophilu fooliishsho maassi`re faninoha ikkanna babbaxxitino latishshi loossano towaatino.
Ledotennino balaxaancho mootitte Zinnaash Taayyaachewu ledo Jigjigu bulleetenna daabbote faafriika maassiisino; faafriiku balaxaancho mootitte borro mininni loosantanni no buxichu aana illachishshino loossa giddonni mittonna baalante gobbara loosantanni afantanno 12 labbino faafriikkanni settikkiha ikkasi xaphoomu ministirchi egensiisino.
Abbebech Maatewoos
Bakkalcho Ammajje 7, 2016 M.D
