– Amaaru afii mittimmate loosu afoo ikkanno gede xa`mo shiqqino
Addis Ababa:- 44ki Afriku mittimma loosu gumulsiisaano amaale mini uurrinshu songo beroAddis Ababaho hanaffino.
Songote aana Afriku mittimma komishiine murrichi Musafaaki Mehamet, IFDR gobbayidi hajo ministirchi ambaasaadder Taayye Atsiqesillaase, mittimmate miilla gobbuwa gobbayidi hajo ministirootinnadipiloomaatootu, mittimmate luphiima massagaano, qasiisote Afriku uurrinshuwa sooreeyyenna kalqoomu uurrinshuwa riqiwamaano afantino.
IFDR gobbayidi hajo ministirchi ambaasaadder Taayye Atsiqesillaase assino hasaawinni; Itophiyu mootimma Afriku daga qarrubbara Afriku mala yitanno hedonni loonsanni hee`noonni. Konninnino aliyye gobbate kifilera kalaqamino qarra harunse iillinoonniha Piriitooriyu keeru sumuumme loosu aana hosiissanni no yiino.
Hattono gobboomittete amaalamme komishiine uurrinse kalaqantanno qarrubba sufotenni tirate loonsanni hee`noonnita kayise; Amaaru afii mittimmate loosu afoo ikkanno gede xa`mo shiqishino.
Afriku mittimma komishiine murrichi Musafaaki Mehamet isi widoonni; baalanti mittimmate miilla gobbuwa uminsa giddo kalaqantanno mimmitu ledo gaancubbara poletiku mala uytara hasiisannota xawisino.
Gaancubba, mimmitu ledo olubbanna mootimma galchine biillonye amadate assinanni harinsho gobbuwate qara qara qarrubba ikkite suffino yiinohu murrichu; xaaddanninke noo qarrubba baalanti poletiku kakkaooshshinni tirama dandiitannote; konni daafira Afrika dagasera keeraa`mitinota assate baalunku halama hasiissanno yiino.
Hattono diilallote gadi soorronninna amadisiisantino qarrubbanni haammatu qansooti heeshshonsa hoogganni nooha ikkasinni, malu hasiisannota coyi`rino.
Amaalete mini songotenni Afriku latishshu ajandubba aana addi addi istiraateejiikete muro sayisanno yine agarranniha ikkanna; hattono daddalunni, rosunni, wedellunna meentunni, gibrinnunni, diilallote gadi soorronni, keerunna ga`labbote hattono wolootta Afrikunnita 2063 ajanda adda assate dandiissanno hajubba aana illachunni torbanno yine agarranni.
Songo techonna ga`a hadhannoha ikkanna 37ki mittimmate massagaanote songo qole ammajje 9-10/ 2016 M.D harinsanniha ikkanno.
Abbebech Maatewoos
Bakkalcho Ammajje 7, 2016 M.D
