– Itophiya ayirrinyisenna wolambinaatisenni ledo ilamate tareessa dandiineemmo gede Adiwu qeelle qaaggooshshi hasiisannoho
Addis Ababa:- Adiwu qeelle qaaggooshshi Muuziyeeme sa’u Qidaame IFDR Pirezidaant Sahleworq Zewudenna xaphoomu ministirchi Abiy Ahmed (D/r) Faajjetenni maassiissino.
Tenne yannara “Adiwa ayirrinsannihu gobba gatisate kakkalantu bareedda qaagatenna hasiisannonsa ayirrinye aateeti” yaatenni pirezidaant Sahleworq Zewude coydhino.
Pirezidaant Sahleworq Zewude amanyootu aana afante assitino hasaawinni, techo Adiwa ayirrinseemmohu gobba gatisate kakkalantu bareedda qaagatenna hasiisannonsa ayirrinyenna baycho aate kaa’lannohuraati yitino.
Ninkera calla ikkikkinni wolaphotenna dagate taalloonyira sharrantanno dagara hexxo uytino qeelle afi’ne hee’ne techo geeshsha qaaggooshshu baychi hee’ra hoogasi xawissino. Qaaggooshshu qaru quchumi mudukko ikkino darga ijaara jawa looso ikkinotano qummi assitino.
Adiwu gobbankera calla ikkikkinni Afrikaho kadonna kadote gashshoote sharrantanno dagara qeellete yitinoti pirezidaantitte; mereeronke ijaarrammora hendeemmo goli gatteenna Afiriku qeelle ikkitinota Adiwu qeelle amada hasiissannonke yitino.
Adiwu anga dieemma, diqeelameemma yitino daga jawa dhagge ikkitino gede qummi assite; Pirezidaantitte; dhaggetenni mito mitore calla goshoonshe yekkeerammeemmo akati dhaggete ama ikkanke huluullisara dandiissanno akataati yaatenni xawissino.
Dhaggetenni dhagge qaaga calla ikkikkinni dhaggetenni rosa noonke yitinoti pirezidaantitte; techo Adiwa qaangeemmohu gobba gatisate kakkalantino bareedda qaagatenna hasiisannonsa ayirrinyenna baycho aate ikkinota xawissino.
Adiwa gaaddu bareedda xaadisinonsahu mitte gobba baxille ikkinota huwachishshe; gobba gatisa badooshshinkera aleenniiti yitino.
Adiwu qeelle Afiriku qansootiranna xaphooma kolidda dagara naaxxillu bueenna wolaphote sharrantu bareedda baala qaaggino bayranna dhaggeeffachishshanno dhagge haruma ikkasino huwachishshino.
Mitte daga jawimma bikkantanno bikkaanchubba mereerinni mitte dhaggete yitinoti pirezidaantitte; Adiwu qeelle kadotenni digaleemma yitino daga bayra dhaggeeti. Konnirano Itophiyunnino sae batinye gobbubbara ayirrisantanno bayra qeelleeti yitino.
Dhaggetenni mito mitore calla xuruurre yekeerammanni hee’noommo. Tini ikkito qole Adiwu annuwa ikkanke huluullisanno akati giddo tugganno yaatennino mishshino.
Konnirano,Dhagge qaaga calla ikkikkinni dhaggetenni rosa noonke yaatenni Pirezidaanicho Itophiyu dagara sokkaseno sayissino.
Xaphoomu Ministirchi Abiy Ahmed (Dokiter) maassote amanyooti aana afame saysino sokkanni xawisino garinni, Itophiya ayirrinyisenna wolambinaatisenni ledo aantanno ilamara saysa dandiinanni gede Adiwu qeelle qaaggooshshi lowo geeshsha hasiisannoho yiino.
“Xa noo mootimma baxisa hooggara dandiitanno, kayinni Itophiyu ay woyteno baxisanno” yiinohu xaphoomu ministirchi; “mootimmate noonke koffeenyinni tenne Adiwu qeelle qaaggooshshe mulla gede assa, wolaphote waaga baattu annuwinke maalanna mundee rakasiisate” yino.
Xa ninke kalqe illiitino tekinolooje horonsi’ne gobbanke latinseemmokkiha ikkiro annuwinke dhagge ragi’rate shenteemmo yiinohu xaphoomu ministirchi; konne dhaggeeffachishanno qaaggoshshe woloottu kolidda daga loossara dandiiturono; Adiwu bareedda ooso ikka kayinni dandiitannokki gede xawisino.
Kunino “kaayyonna sharro xaadduro biifanno” yitanno yaattonni Itophiyu qansoota ikkankenni baraa’ne loosatenni wodananna sharro waante qaaggooshshe loonsoonnita xawise; 128 diri gedensaanni Itophiya lambenna Itophiya ikkine ilamate saysa dandiissanno garinni loosamasi coy’rino.
Tenne dhaggeeffachishshanno Adiwu qeelle qaaggooshshe woloottu kolidda daga gobba loosa dandiiturono Minilik, Baalcha Gebeyyonna Aluula Abbaanagg ooso ikka kayinni didandiitannono yiino.
Adiwu qaaggoshshe rakasiisa yaa annuwinke miqqanna mundee rakasiisate yaate yiinohu xaphoomu ministirchi; Adiwu qaaggooshshi sharramme daafurre loonsoommoho yiino.
Annuwinke ragi’nammora hasiisannohu wolambinaate, ayirrinyenna mittimma ikkinnina giira ragi’nammora dihasiisannonke yaatenni qummi asse; annuwinke waaga baattinohu wolambinaateho, ayirrinyehonna hornyaho ikkanna; hadhino doogo kayinni giira ikkitinota xawisino.
“Itophiyu horo duroo’mitanno; giddonna gobbanni ka’inose diinnano hiitto qinaawise yite xa’mitanno” yiinohu Abiy Ahmed (Dokiter); “Itophiya yaamamanno Horophilli motore iibbishidhanni gugguuffanni no; buubbaraatino” yiino.
Annuwinkenni ragi’noommo gimbi yaa hasiissanno gede xawisate techo barra Itophiyu qanso latishshahonna lophote mittimmate qaale e’anno barraati; ayirrinyisenna wolambinaatisenni ledo ilamate saysate togoo qeellete qaaggo hasiissannoseno yaatenni coy’rino.
Xa dhaggete Adiwu qeelle qaaggooshshi Tsehay Horophill heerase qummi asse; annuwinke umikki tekinoloojete gumanna malaateno ikkitino gede xawisino.
Looso ninke hananfoommo; ilama kayinni gumultanno yiino Abiy(Dokiter) Itophiyu gottiinyase la”a noose; huluullantinanninkeri wodanchitine la’e yino.
Addis Ababu Quchumi Kantiiwa Adaanech Abeebe ise widoonni yitino garinni; Adiwu qeelle qaaggooshshi mUUziyeeme Adiwu bareende gaaro wara’a yitino xerri yite keeshshitino dhaggete naqaashshubba gamba yitinonna hawantinori qaagantinoho.
Gaazeexu Odeessaanchinni
Bakkalcho Ammajje 7, 2016 M.D
