– 6 agani giddo 1 miliyoone ali qansootira loosu kaayyo kalanqoonni
Addis Ababa:- Waagu iibbabbo ga`labbisate harinshonni afi`noonni soorro sufisiisate mootimma baxxino illachinni loossanni noota Xaphoomu Ministirchi Abiy Ahimed (Dr) xawisi.
Dagate riqiwamaano amaale mini 14ki uurrinshu songonni Xaphoomu ministirchi Abiy Ahimed (D/r) waagu iibbabbo lainohunni amaalete mini miillanni ka`inosi xa`mubbara dawaronna xawishsha uyino.
Xawishshisinnino, waagu iibbabbo jawa gobbate jifo ikkitinota xawise; wole kalqerano luphiima qarra ikkitinota kayisino. Ikkinohura, konne kalqoomu qarra Itophiyu dandiite uurrate loossanni afantanno yiino.
Waagu iibbabbora korkaatimmatenni kullanniri mereerinni hasi`nanni bikkinni laalcho laashsha hooga, ga`labbote qarranna dikkote xaadooshshi kaajja hooga, kaajjado rifoormete loossa hooganna woloottano xawisino.
Konni korkaatinnino waagu iibbabbo hasi`nanni deerrinni ga`labbisa didandiinoonni yiino. Ikkollana, waagu iibbabbo konni albaanni xibbuunni 35% ikkitinowiinni xaa yannara 28% woffi assa dandiinoonnita xawisino.
Tenne boode soorrora Qamade, Ruuzenna wolootta gibirinnu laalchubba batinyunninna hala`ladunni laashsha dandiinoonnihuranna maatete Jireenyinnino ikkinota coyi`rino. Aanteteno laalchonna laalchimma kaajjishanna sufote rifoormete loossa loosa, buxanete aana illachishshino loossa kaajjinshe sufate aana illacha uyine loonsanni yiino.
Itophiyu miinji 2016 baajeetete dirinni xibbuunni 7.9% lopho borreessiisannoha ikkasino coyi`rino. Amadisiiseno, sa`u 6 aganna giddo 1 miliyoone roortanno qansootira loosu kaayyo kalaqantinota Xaphoomu ministirchi xawisino.
Loosu kaayyo kalaqo lainohunni Xaphoomu ministirchi Abiy uyino xawishshinni; diru dirunni luphiima ikkitino loosu hasatto no. Baajettete dirinni 6 agani giddo 1 miliyoone ali qansootira loosu kaayyo kalaqantinonsata xawise; 150 kume qansootino gobbayidi gobbuwara loosu bobbaaso assitinotano coyi`rino.
Konninni, babbaxxitino gobbuwara bobbakkino qansooti qoossonsanna ayirrinyensa agarreennansa loossanno gede kaajjadu loosi loosaminota huwachishino. Xaano diru dirunni noo hasatto kaiminni baca wo`naalsha assa xa`mannota lede xawisino.
Abbebech Maatewoos
Bakkalcho Arfaasa 30 / 2016
