Addis Ababa:- Gobboomu deerrinni luphiima loosu hoonge xiiwo leeltanno 11 quchummara wedellu mootimmatenna hallanyu handaarinni loosu aani rosicho afidhanno pirogiraame gumullanni hee’noonnita Loosunna Ogimmate Ministir Dieeti Nigusu Xilahuni coyi’ri.
Ikkadimmatenni wedellu loosu aana rosicho adhitanno pirogiraame umikki doyichonni loonsoonni loossara afanshunna galatu bare sa’u lamalara Hawaasi quchumira harinsoonni.
Barete leelle hasaawa assinohu IFDR Loosunna Dandoote Ministir Dieeti Nigusu Xilahuni; wedellu ikkadimmatenni loosu aani ogimmanna dandoo adhitanno gede asssinanni pirogiraame baxxinohunni ogimmatenna hayyote hattono wolootta jajjaba rosu uurrinshuwa e’e rosate kaayyo hooggino wedella horaameeyye assitannota coyi’rino.
Gobboomu deerrinni xaa yannara luphiima loosu hoonge leeltanno 11 quchummara mootimmatenna hallanyu handaarinni wedellu ikkadimmate loosu aani dandoonna rosicho adhitanno gede assinanni hee’noonni yiinohu Ministir Dieetichu; wedellu heeshsho soorrate duuchu handaari loossa gumullanni hee’noonnita kaysino.
Amadisiiseno, hallanya uurrinshuwa loosu gade rossino wedella qaxaransa loosinsanni woyyaawa soorro abbate dandiissiisannonsata kule; tini pirogiraameno quchummate lophonnino sae gobboomu deerrinni abbitanno soorro jawa ikkitinota huwachishino.
Sidaamu qoqqowira mootimmatenna hallanyu handaari widoonni wedellaho loosu kaayyo injeessate ragaanni gummamma loossa loonsoonnita coyi’rinohu kayinni Qoqqowu layinki pirezidaantichi kalaa Beyyene Baraasiho.
Kalaa Beyyene xawishshi garinni; tenne pirogiraamenni haammatu wedelli ogimmate qajeelshubba afidhannonna quchumaho afantanno hallanyu laashshaanonna owaantete handaarrara loosu kaayyo rosicho afidhanno gede assinoonni.
Pirogiraamete umikki doyichonni 891 quchumu wedelli horaameeyye ikkinotano barete xawinsoonni. Wedellu qajeelshu ogimmansa lossi’ratennino sa’e uurrinshuwate loosu kaayyo afi’ra dandiitinota kulino.
Wedellu gobbate lophora noonsa qeechi luphiima ikkasi xawisinohu kalaa Beyyene; mootimma hallanyu handaarinni ledo halamatenni wedella qajeelsatenna loosu kaayyo injeessate loossino loosi gummaamo ikkasi qummeessino.
Qinaambe loosatenni wedellu loosu aani rosichonna ogimma afidhanno gede assatennino sae loosu kaayyo horaameeyye ikkitanno gede uurrinshubba yawonsa fultino daafira galatasi shiqishino.
Sidaamu qoqqowi Loosunna Dandooet Biiro sooreette dukko Hageretsiyoon Abbebe ise widoonni; pirogiraame konni albaanni loosu kaayyo kalaqo mootimmatenna boode bissara calla agurate laooshshe soorritinote.
Tenne pirogiraamenni hallanya uurrinshubba qajeelshunninna qaxaratenni wedellaho loosu kaayyo aatenni sae uurrinshuwano uminsanni horaameeyye ikkitanno gafi fa’namino yitino.
Hawaasi quchumira 735 wedella qaxarate dandiitannori hallanya uurrinshuwa noota xiinxallotenni bandoonnitano coyidhino. Umikki doyichonni loosu aani rosicho adhate pirogiraamenni 110 uurrinshuwa halantinotano sooreette qummeessitino.
Gaazeexu Odeessaanchini
Bakkalcho Arfaasa 30 / 2016
