Addis Ababa:- Gaancubba kalaqantinonna sumimme hooggino qooxeessubbara hegeraamo keere abbate araaru hasiisannota Kalqoomu Keeru Baanke safaanchinna loosu harisaanchi kalaa Argaw Ayyele coyi’ri.
Abeeneze Kaa’lotenna Lophote Maamarinna “Global Peace Bank” safaanchinna loosu harisaanchi kalaa Argaw Ayyele Itophiyu pireesete uurrinshara xawisino garinni; uurrinshansa kalaqamunninna mannu kalaqino qarrubbanni gawajjantino dagoomu bissa kaa’latenna irkisatenni loossanni afantannota.
Xaa geeshshano doogimaroho ubbino ooso, babbaxxitino korkaattanni gawajjantinonna miicantinore dagoomu bissa kaa’late looso loonsanni dangoommo yiinohu kalaa Argaw; ikkollana, qarru kalaqami gedensaanni irkisate looso ikkinnina qarru kalaqamannokki gede balanxe diloonsoommo yaanno.
Abeenezer kaa’lotenna lophote maamari widoonni sa’u 18 dirrarano gawajjantinore haammata dagoomu bissara uurrinshankenni mannihimmate irko assinoommo yiinohu kalaa Argaw; woloottu gawajjantannokki gede kayinni balanxe illacha tunge loosa hasiissannota huwachishino.
Dagoomu bissa gawajjanno rosichinni, ga’labbote qarrinni, hattono woxu dhuki anjenni heeshshonsa hembeelama dinonsa yaanno.
Kalqoomu Keeru Baankehu qaru illachino qarrubba kalaqantu gedensaanni irko assa calla ikkikkinni; qarrubba kalaqantannokki gede loosate; baxxinohunni, gaance kalaqantu gedensaanni kayinni araaru dirranno gede assate looso ikkasino xawisanno.
Qarrubba hasaambe tidhate rosichi hee’rara hasiisanno; hasaawu araaraho iillishanno yaannohu kalaa Argaw Ayyele; ga’a ilamara jawa wowe ikkara dandaannohu hegeraamo gobbate keerenna ga’labbo buuxisiisa ikkinota qummeessino. Konnirano duuchunku gobboomitte qeecha fula hasiissano yaanni huwachishino.
“Lawishshaho, uurrinshankenna hajo la’annonsa bissanni ledo ikkatenni Tigirayete qoqqowira gaancete korkaatinni gawajjantinore dagoomu bissa basete geeshsha marre la’’ate dandiinoommo; olu kayinni qooxeessaho afantanno qoqqowubba dagano gawajjinoha ikkasi la’noommo. Oromiyu qoqqowirano hattonni dagoomu aana jawa gawajjo iillitino. Iillitannino afantanno” yaanniiti naqqasinohu. Konnira kayinni sufino keerinna araarira hixamanyine loosa hasiissanotano coyi’rino
Konni kaiminni, gobbate gede kalaqantinota sumuu yaa hoongete qarrubba tirate deerru deerrunkunni araara kara hasiissannota duure huwachishino.
‘’Golobal Peace Bank’’ yaannohunni safantinoti Keeru baanke; keere hasidhannori baalu gutantannotanna mannihimmate qoosso agarsiisate loossannota baalunku baanke ikkaseno kalaa Argaw xawisanno.
Itophiyimma kaajjado qansichimmaati yaannohu kalaa Argaw; gobbankera kalaqantinota gutunni sumuu yaa hoongete qarra tiratenna gobboomu mittimma kalaqate bero sa’noommo safora ikkikkinni techo hee’noommonna ga’a hee’neemmo safo hedote giddo worre araara kalaqa hasiissannota huwachishanno.
Sa’u gashshootubba yannara kalaqamino bassa duucha yannara komate gede kayinsanni mimmito giwatenna xiiwate ikkitubbanni fulle keerunna danchummate hedo widira reekkama hasiissannotano lede qummeessanno.
Kalqoomu keeru baanke xaa yannara Sidaamu qoqqowi mootimmanna wolootta keeru daafira loossanno uurrinshuwanni, IFDR Keeru ministere hattono Gaamo zoone gashshootinni ledo qinaabbe loossanni afantannotano coyi’rino.
Amsaalu Felleqe
Bakkalcho Arfaasa 23, 2016 M.D
