– Konne ha’nura bude Afriku dhaggete Mazigawira borreessiisate millimmo hananfoonni
Addis Ababa:- Sidaamu daga keere haadhannohu ‘Dayooe Bushshu’ hornyi daga wosina adhate noonsaha jawa bayichonna ayirrinye leellishannoha ikkasi xawinsi.
Kuni hornyi gobbankenni sae Afrikaho egennamanno gede loonsanni hee’noonnita kulloonni.
Hajote aana Itophiyu pireesete uurrinsha ledo hasaawa assinohu Sidaamu qoqqowi Woga, Turizimetenna Ispoortete Biiro Sooreessi kalaa Jaggo Agenyewu coyi’ranni; Sidaamu daga keere haadhannohu ‘‘Dayooe Bushshu’’ daga wosina adhate noonsaha jawa bayicho, ayirrinye, baxille, mimmitu mereero noo adhamooshshenna irkisama luphi asse leellishannoha ha’nura bude ikkasi egensiisino.
Afriku dhaggete uurrinsha safaanchi kalaa Ashshennaafi Alamu muli yannanni ‘’Seifu on EBS” qixxaawo aana shiqe tenne hajo kayisinoti qaangannita ikkitanna; hattenne bowirsate hende xaa yannara qoqqowoho ayirrinsanni hee’noonni woganna budu Festivaale ledo mittoonsine loonsanni hee’noonnita kalaa Jaggo Bakkalcho Gaazeexi ledo assino hasaawinni lede xawisino.
Diru dirunkunni ayirrinsannita Sidaamu wogate simpooziyeeme tayxeno Arfaasa 21-25/2016M.D geeshsha Hawaasi quchumira ayirrinsanni hee’noonniha ikkanna; kalaa Ashshennaafi Alamu Afriku dhaggete uurrinsha safaanchonna tenne hedo burqisaancho ikkasi bikkinni ‘‘Dayooe bushshu’’ hornya egensiisate looso loosanni qixxaawote beeqqaanchooti yiinohu Biirote Sooreessi; ninkeno Sidaamu ilama ikkanke bikkinni ledo amaxxine lophinoommo rosicho ikkirono wolootu dagaranna gobbayidi gobbuwara egensiisate jawu qeechi noonke yiino.
Konni daafira dagate egensiisatenna budu simpooziyeemennino luphi assine leellishate looso gumullanni afammeemmo yaanni coyi’rino.
Tayxeta Sidaamu budu simpooziyeeme Arfaasa 21-25,2016M.D geeshsha “Budu latishshahonna mittimmate” yaanno uminni Hawaasi quchumira ayirrinsanni hee’noonniha ikkanna; Simpooziyeemete ayirrisama qarunni ilama budensa garunni affanno gede, dhaggenna balchoomansa huwattanno gede dandiisate ikkinota Biirote sooreessi kalaa Jaggo lede egensiisino. Festivaaletenni harunsine “Affini” Filmeno aanini aganira Ammajje 2/2016 MD Hawaasa wogate harira jajjabba biilto noowa maassiinsannitano qummeessino.
Qiddist Gezzaheny
Bakkalcho Arfaasa 23, 2016 M.D
