Addis Ababa: Sidaamu Qoqqowi Pirezidaantichi Kalaa Desta Ledamohunni massagantino gaamo Aliyye Sidaami Zoonera qasiisotenni latinsanni hee’nonnita arri gorsu loossa towaanyo assitu.
Pirezidaantichu Kalaa Desta Ledamohunni massagantino mootimmatenna paartete loosu sooreeyye gaamo bero Aliyye Sidaami Zoone Shabbadiini woradira qasiisotenni latinsanni hee’noonnita arri gorsu loossa towaanyo assitino.
Pirezidaantichu tenne yannara, Sidaamu qoqqowira arri gorsu loosinni addi addi gati laalchonna gumma hattono arri Qamade laashshate loosi diru dirunkunni dancha soorronna guma abbanni noota coyi’rino.
Xeena agarre calla laashshi’ratenni fulino giwirinnu looso loosa taxxeessu nookki laalcho laashshi’ratenni suffino dagate horaameessimma buuxisiisate jawa qeecha godo’lanno yiino.
Giwirinnu laalchonna laalchimma ledatenni daganke heeshsho woyyeessate, dikkote oolto gargaratenna wedellaho hala’lado loosu kaayyo kalaqate mixi’ne assinonni sharronni lowo soorro daggino yiinohu pirezidaantichu; kuni gumino antete kaajje sufanno gede loosa hasiisanota huwachishino.
Jireenyu Paarte Sidaamu Qoqqowi Sinu Borro Mini Sooreessi Kalaa Abirihaam Maarshaallo isi widoonni; yanna yanantenni assinanni sharroni Sidaami giddo loosu amanyooti woyyaawanni dayno. Kunino maatete Jireenya hawaqisate tungonni timo harancho yanna gido buuxisiisa dandinanni deerrira he’noonnita leellishannoho yiino.
Mootimma massaggannoti Jireenyu Paarte dagate e’ino qaale gumulate qineessitino giwirinnu handaari qaru illachi giddo gorsu loosi mitto ikkinota qummeesse; laalotenna gummate laalchi daganketa miinjunna dagoomitte qarrubba qarunni tirtanni afantannota xawisino. Tinni soorro baalante maateta ikkitanno gede aantete wo’muku halama hasiissano gede sokkasi saysino.
Qoqqowu Irshunna Kalaqamu Jiro Latishshi Biiro Sooreessi Kalaa Memmiru Moke isi widoonni; kaajjado giwirinnu ekistenshiinete loosinni irkinse hananfoonni gati laalonna gumma laashshate loosi qoqqowu gede dagate giddo jawa kakkaooshshe kalaqinonna gumano abbanni noo gede xawise; togoo towaanyo aantete wolootta woraddarano suffannota coyi’rino.
Addisu Adoola
Bakkalcho Arfaasa 23, 2016 M.D
