Addis Ababa: Xaphoomu ministirchi Abiy Ahimed (Dr) Halantino Mootimmuwa Sagaletenna Irshu Uurrinsha, Xaaliyaanaho Roomi quchumira qixxaawino ayyaanira ayirrinoha ‘’FAO Agiriikoollu’’ meedaaliya baraa’rino.
Baraarsha Xaphoomu ministirchi sagalete wowenna taaltino sagale shiqqora leellishino massagonna murci’raanchimmara; saeno rahino soorramaanchonna jifaancho ikkino akati giddoonni Qamadete laalchinni umo dandaate massagino hayyora afansha aate baraansoonnisiho.
Xaphoomu ministirchi Abiy, babbaxxitino gobbuwa jajjabba soqqamaasine gaamo, kalqete deerri uurrinshubba riqiwaano, Xaaliyaanaho afantanno dipiloomaatta hattono hallanyu handaari riqiwaano afantinowa baraarsha adhino. Itophiyu sa’u onte dirrara giwirinnu handaarinni qara Investimentubba bobbakkinoha ikkanna; Qamadete laalchinni umo dandaate loossa loosatenni qara qara laalchubba aanano jawa lopho borreessiissinno.
Xaaliyaanu keeshshosinni gummaamo ikkinota xawisinohu Abiy Ahimed (Dr) “Techo ‘’Tsehay’’ Xaaliyaanu mootimmanni faajjetenni adhinoommota ayirrinseemmo barra ikkasinni Itophiyu qansooti baalanko naaxxillu barraati” yiino.
Xaaliyaanu Xaphoomu ministiritte Jiorjiya Meeloone sai mittu dirira “Tsehay” yaamantanno Horophila qollanni gede kaa’lasinni galatasino shiqishino.
‘’Tsehay’’ Awuropu kiiro 1935 garinni Heer Ludiwiig Weeber yaamamanno Jarmanete Injiinerichinna Mootichu Horophilu buuwisaanchi hattenne yannara noori Itophiyu ogeeyye halammenni Itophiyaho umikki yannara loosantino Horophilaati. Su’miseno Balaxaanchu Haylesillaase beetto Li’’ilt Tsehayi qaagate uynoonnihonkanni.
Addisu Adoola
Bakkalcho Arfaasa 23, 2016 M.D
