Addis Ababa:- Daga saadate jironni garunni horonsi’raano assate illacha tugge loossanni afantannota Sidaamu qoqqowi saadate jiro latishshi biiro egensiissu.
Biiro 2016 baajeettete diri 6 aganna loosu jeefishshi keenonna aantino mixo lainohunni hasaawu bare Hawaasi quchumira harissino.
Keenote bare hasaawunni faninohu qoqqowu saadate jiro latishshi biiro sooreessi kalaa Teklu Jomba; biiro qoqqowu loosidhe galtino daga, wedellanna meento horonsi’raano assitanno loossa aana illachishshe loossanni afantannotanna; konninnino illete leeltino soorro dagganni noota xawisino.
Biiro baxxinohunni looso hooggino wedellanna meento saadate jiro latishshi loossa aana beeqqisiisatenni miinju dhukinsa bowiranno gedenna heeshshonsannino jawaachishshanno soorro borreessantanno gede baxxino illacha tugge loossanni keeshshitinota sooreessu lede coyi’rino.
Horonsi’raano adote jironni, lukkuwu jiro latishshinni, kirrete latishshinni, diidu ce’’attonni, saada misiisate loossa hattono saadate sagale latishshi loossa aana hala’ladunni beeqqitanno gede assa dandiinoonnita egensiisino.
Gumulantino loossanni baxxinohunni meentunnita miinju horonsi’raanchimma lossate meentu afi’ranno e’’onni suuqi’rate budensa bowirsatenni saadate jiro latishshi loossa aana hala’ladunni beeqqitanno gede assinoonnita sooreessu lede xawisino.
Ledoteno gutu hasattonni tantanante saadate jiro latishshi aana bobbakkino horonsiraano miinju deerrinsa yanna yannatenni lophanni dayinota la’noonni. Ba’rete aana loosu jeefishshi keenonni ledote aantino lee aganna mixo shiqqeenna hasaawa assinoonni.
Gaazeexu Odeessaanchinni
Bakkalcho Arfaasa 16, 2016 M.D
