Addis Ababa:- Amandoonnihu 2016 rosu diri goofimarchi geeshsha qoqqowoho 100 iikkitannota balaxote rosi minna ijaarate mixi’ne loonsanni hee’noonnita Sidaamu qoqqowi Rosu Biiro egensiissu.
Roso ilamate yaannohunni rosu minna safote latishshuwa woyyeessate qoqqowoho dagate millimillo kalaqatenni baalante woraddanna quchummate balaxote rosi minna halashshate illachinshe loonsanni hee’noonnita Rosu Biiro sooreessi kala Bayyani Baraasihu xawisino.
Rosu amanyooti ragaanni sa’u boode dirrara 3kinna 4ki kifile iilliturono nabbawa, borrreessanna shallaga dandiitannokki rosaano noota kayse kalaa Bayyani; konne qarra tirate qaaqquullu balaxote roso garunni afidhanno gede assa hasiissannoyiino. Konnira, qoqqowu deerrinni balaxote roso halashshate jawa illacha tungoonni yaanni qummeessino.
Qoqqowu mootimma aantaanchu pirezidaantichinna Rosu Biiro sooreessi kalaa Beyyene Baraasi xawishshi garinni; qaaqquullu balaxote rosinni hanaffe rossanni dagganno gede assa hoongiro rosu isilanchimma buuxisiisa didandiinanni. Konni rosu dirinnino dureeyye, mootimma, hallanyootunna mootimmate losaasine halantanno gede assatenni kiirotenni 100 balaxote rosi minna ijaarate mixi’ne loonsanni hee’noonnita kulino.
Kuri giddonni 20 ikkitannoti balaxote rosi minna qoqqowu mootimmate loosaasine woxu fushshaatonni ijaarantanni noota xawisino.
Rosu minna deerransa agadhitino garinni baalante qooxeessubbara mitt ugari Diizaynenni ijaarranniha ikkanna; xaa geeshshano 48 ikkitannori ijaarshu loosi loosamanni nooha ikkanna; 14 rosi minna ijaarante owaante uytanni noota qummeessino.
Konni garinni baadiyyeteno ikko quchummate heedhanno qaaqquullu taalo ikkino rosu kaayyo afi’ra dandiitannonna baalante qooxeessubbara rosu iillo halashshina geeshsha roso ilamate yitanniti dagate millimillo kaajjite suffannotano egensiisino.
Qoqqowoho xaa geeshsha roso ilamate yaannohunni harinsoonni dagate millimillote bare 407 miliyoone ale hendanni jiro dagoomuwiinni gamba assa dandiinoonnitano Biirote sooreessi lede coyi’rino.
Rosu ministere sai diri goofimarchira rosu minna safote latishshanna deerra woyyeessate dandiisiissanno ‘’Roso ilamate’’ yaannohunni gobboomu deerrinni dagate millimillo hanafisiissinoti qaangannite.
Gaazeexu Odeessaanchinni
Bakkalcho Arfaasa 16, 2016 M.D
