Addis Ababa: 19ki ce’e galtinori barri ayyaana qooxeessu gobbuwa miinju, dagoomunna dipiloomaasete xaadooshshe roorenkanni kaajjishate loonsannita Gorsunna gammaajjichaamu qooxeessi minister Dieeti Dr Indiriyas Geeta xawisi.
Soojjaati Afirikira ce’e galtinore beeqqisiiisino garinni ayirrinsanni ayyaani “Ce”e gala Soojjaati Afirik fakkana kuula” yaanno massagote qaalinni Arfaasa 17- 23/2016M.D geeshsha Addis Ababaho Milineemete harira harinsanni.
Ministir Dieetu Dr Indiriyas Geeta Itophiyu Pireesete Uurrinshara xawisino garinni; konni albaanni gobboomu deerrinni ayirrinsanni keeshshinoonnihu ce’e galtinori barri tayxe baxxino garinni Soojjaati Afiriki gobbuwara ce’e galtinore, jajjabba biiltonna dipiloomaatoota beeqqisiisino garinni ayirrisate qixxaawo assinoonni.
Ayyaanaho gobbuwate dhaggete, wogatenna miinju xaadooshshe roorenkanni kaajjishshanno addi addi leellisho, ekisponna paanaalete hasaawubba heedhannota kulloonni.
Tayxe ayyaanirano baxxino garinni ce’e galtinori heeshsho dannu ittisannokkita ikkasenni; qooxeessaho noo ce’e galtino manni seeda dirra kiirsiisino dagoomu xaadooshshi roortino miinju horora qeecha fulanno gede hedatenni qixxaawo assinoonnita xawisino.
Ayyaanu qooxeessu xaadooshshe kalaqanno garinni ayirrisamanno gede mootimma raga worasenni tayxe “Ce”e gala Soojjaati Afiriki fakkana kuula” yaanno massagote qaalinni ayirrisamannota qummeessino.
Gaala gulufanna Gaalu Ado qamasate leellisho ayyaanaho heedhanno qixxaawubba mereerinni ikkitinota xawise; paanaalete hasaawubbano IGAD widoonni koysantinonna kiironsa 250 ale ikkitanno gobbuwa ce’e galtinori riqiwaano, dipiloomaattanna giwirinnu ogeeyye beeqqitannota kulino.
Massagote qaali hedo ce”e gala baalante gobbuwa daga xaadisannonna fakkana kuula kalaqqannoha ikkasi leellishate qineessinoonnita Minister Dieetu huwachishe; ayyaana beeqqitannori ce’e galtino manni budunna miinju xaadooshshensa kaajjisha’ratennino qoteho gutunnita ikkitino moolle, lolahu danonna seerimale daddalo labbanno qarrubba aana hattono latishshu doorshubba aana roorenka shiqqe loossanno gede injiino akata kalaqanonsata xawisino.
Ministir Dieetu xawishshi garinni; ayyaanu hanafo barra calla addi addi qoqqowubbanni daggino 500 ali ce’e galtino manni qooxeessinsara afantanno addi addi kalaqamu elto ayyaanu beeqqaanora leellishshanno bare qixxaabbino.
Ayyaanunni Affaarete ce’e galtino manna Jibuuti ledo, Sumaalete ce’e galtino manna Somaal-Laandinna Somaalete ledo, Oromiyaahonna Wodiid Galchim Itophiy qooxeessubbara afantannore qole Keeniyu ledo, Gaambeellaho ce’e galtino manna Wodiid Suudaane hattono Beenishaanguli ce’e galtino manna Suudaanete ce’e galtino manni ledo budu, dhaggete, miinjunna dikkote xaadooshshensa roorenka kaajjishidhanno bare kalaqannoho yiino.
Ministir Dieetu ayyaanu ce’e galtinori qooxeessubba daa’’attotenna Investimentete injo leellishate wo’naallanniwa ikkinotano kaysino.
Qooxeessaho ce’e galtinori rosicho soorri’ratenni daddalu xaadooshshensa roore lifixisidhanno gede hattono gutu qarrubbansa aana malu faasho woratenni horaameessimmansa kaajjishshidhanno gede kaayyo kalaqannoha ikkino gede xawisino.
Ayyaanu gobbate gede ayirrasi ce’e galino manni duucha hige kaysanno hajubba illacha afidhanno gedenna poolisetenninna Istiraateejetenni irkisamanno gede qeechasi fulannota Minisrir Dieetu lede coyi’rino.
Lamu dirinni mitteege ayirrisamanno ce’e galtinori barri kalqete ce’e galtinori duuchu handaari qarrubba tidhantanno gedenna illete leeltino malu faasho ofoltanno assate ragaanni naandanni gumi borreessamasino
Addisu Adoola
Bakkalcho Arfaasa 16, 2016 M.D
