‘‘Hiittenne hayyono horoonsi’no wedellaho loosu kaayyo kalanqeemmo”yaanno massagote qaalinni Sidaamu Qoqqowi Loosu, Dandoonna Interpirayzootu Latishshi Biiro 6 agani loosu jeefishshi keeno hasaawanna taqqate afantanno loosu massagaanora qajeelsha uyitino.
Barete leelte hasaawa assitinoti Biirote Sooreette Dukko Hageretsiyoon Abbebeti Biiro wedellaho loosu kaayyo kalaqate umo assite ikkadimmate qajeelsha uyite loosoho bobbaasatenni danchu gumi maareekkisamanni leellannota xawisse; konni albaanni balaxote qajeelsha uyinikkinni liqoo calla injeessatenni loosoho bobbaasa horonsa buuxisiissinokkita xawissino.
Qoqqowu giddo afantannoti 16 Tekiniketenna Ogimmate Kolleejjubba Wedellaho ikkado qajeelsha aatenni sa’e; qajeelte fultino wedelli loosoho bobbakkanno yannara hajo la’annonsa bissa ledo waaxante irkisanna harunso assa hasiissannonsata sooreette huwachishshino.
Konne looso ammanatenninna ammansiisatenni danchu gumi leellanni nooha sufisiisatenna konne handaara hasamannohanna doodhinanniha assatenni qoqqowohono ikko gobbate deerrinni ogimmatenni heewisantanno wedella kalaqate hajo la’anno baali qeechansa fula hasiissannonsatano guwuursitino.
Bakkalcho Arfaasa 16, 2016 M.D
