Addis Ababa:- Dagatenna mootimmate jiro raaqatenni ayirrate assinanni sharro aana kaajjado seeru, gashshootunna poletikunnita rosiissanno qaafo adhinanni hee’noonnita xawinsi.
Mussinnunna bainchu assooti lophote hekko, gobbanna daga gawajjanno assoote ikkasi huwante; gobboomunna qoqqowu tsere mussinnu komite tantanatenni mussinna sharramate loonsanni hee’noonnitaati xawinsoonnihu.
Sidaamu qoqqowi Amanyoomunna tsere-mussinnu komishiine mussinnunna bainchu assooti aana assitino xiinxallote gumi aana hajo la’annonsa bissa ledo Yirgaalamete quchumira hasaawa assitino.
Hasaawu bare aana afaminohu Sidaamu qoqqowi Jireenyu paarte sinu borro mini poletikunna dhuku dhaabbanyooti handaari sooreessi kalaa Asfaw Gooneesso coyi’ranni; dagatenna mootimmate jiro raaqatenni ayirrate assinanni sharro aana kaajjado seeru, gashshootunna poletikunnita rosiissanno qaafo adhinanni hee’noonni yiino.
Mussiinnunna bainchu assooti uurrinshuwa, dagoomanna gobba gawajjannoha busha assoote ikkasino xawisino.
Kalaa Asfaw ledotenni; gaammanni baajeette hendoonni illachira hosiisanna suwashsho jirote beehache buuxisa suwashsho lophoranna Jireenyaho qara ikkanna, dagatenna mootimmate mereero kaajjado ammanama kalaqatenni dagannita latishshunna danchu gashshooti xa’mo qolate widoonni mootimmanna paarte luphiima qeecha fultanno yiino.
Qoqqowu Amanyootunna tsere mussinnu komishiine komishinere dukko Zelaalem Lamma ise widoonni; mussinnanna baincho assoote gargarate hajo la’annonsa bissa gutu huwanyootenna uurrinsha amadatenni sharrama hasiissannota kayissino.
Komishiinete 6 uurrinshuwa (Rosu minnara, Dagitte owaantenna mannu jiro, Fayyimmate, Loosunna dandoote, Eotenna mootimmate hidhote womaashshi) uurrinshuwa aana assinoonni xiinxallonni afi’noonni guminni seejjatenna qarru ledamannokki gede assate amaalammete bare ikkase kayissino.
Komishiine yanna yannatenni assitanno xiinxallonni qajeelshunna harunsote loosi mussinnanna baincho assoote gargarate huno leeltuwa seerunna gashshootu qaafo adhatenni taashshate loossa kaajjishshe massagganni afantannota dukko Zelaalemi xawissino.
Amaalammete bare aana xiinxallote gumi taje shiqqeenna hasaawa assinoonniha ikkanna; hasaawu aana qoqqowu, zoonnatenna Hawaasi quchumi jajjabba loosu massagaano hattono woraddatenni fultinori hajo la’annonsari loosu bissa beeqqaano ikkitino.
Qiddist Gezzaheny
Bakkalcho Arfaasa 16, 2016 M.D
