Addis Ababa:- Gobboomitte amaalammehu kaimu halaale hasi’ra ikkinota Amaalammete komishiine komishiinerichi Yoonaas Adaayye (Dr) coyi’ri.
Babbaxxitino dagoomu bissa riqibbe amaalammete beeqqaaano ikkitanno bissara qixxaabbino bare tenne lamalara Buttajiru quchumira harinsoonni.
Barete leelle hasaawa assinohu Gobboomitte amaalamme komishiine komishiinerichi Yoonaas Adaayye (Dr.) gobboomitte hajubbankera sumuu yaatenna qarrubba tidhate ha’nura ikkitino egennonna hornyubbanke garunni horoonsi’ra noonke yiino.
Budu, amma’no hattono ha’nura ikkitino gobboomitte hornyubba noonke daga ikkankenni hornyubbanke horoonsi’ne gobboomitte qarrubbankera mala kalaqa dandiinanni yaanniiti xawisinohu.
Amaalamme yaa halaale hasi’rate yiinohu Komishiinerichu’ halaalu widira iillate kayinni halaalaancho doogo amada hasiissannota huwachishino.
Amaalammete bude lossidhino gobbuwa latishshunninna lophotenni jawa deerra iilla dandiitino. Qarrubbansa lainohunni hasaabbinokki gobbuwa kayinni jawu qarri giddo ubbinotano lede qaagiissino.
Itophiyaho harinsanni amaalamme dagatenna fullahaanotewiinni hedo adhine sumimmete widira iillineemmo doogooti yiino.
Gobboomitte amaalammeti hedo babbadamooshshenna sumuu assitannokki ikkitubba kalaqanturo hattono poletiku qarrubbanna olu gedensaanni noo yannara poletiku reekko giddo noo bissa mereero sumimme kalaqate kaa’litannotano Komishiinerichu xawisino.
Amsaalu Felleqe
Bakkalcho Arfaasa 16, 2016 M.D
