Addis Ababa: Soojjaati Sidaami Zoone yannaasincho gibirinnu tekinolooje horonsi’ra hanaffinota Zoonete baadiyyete latishshi biddishshi xawisi.
Yannaasincho gubirinnu tekinolooje gidu laalcho gamba assitannotanna baatto hawuurtannota ikkase kulloonni.
Soojjaati Sidaami Zoone Baadiyyete Latishshi Biddishshi Sooreessi Kalaa Arbo Jaldeessa Itophiyu Pireeseete Uuurrinshara xawisino garinni; Soojjaati Sidaami Zoone gidu laalcho gamba assitannonna baatto hawuurtanno yannaasincho gibirinnu tekinolooje horonsi’ra hanaffino.
Kalaa Arbo xawishshi garinni; tini yannaasincho gibirinnu tekinolooje gide middannonna baatto hawuuratanno Kombaynerranna Tiraakiterra ikkitanna; xaa yannara zoonete giddo Arooreessu, Bansinna Burru Woraddara horonsi’ra hananfoonni.
Tekinolooje lowo mannu wolqanni loonsanni looso yannite hayyonni riqiwatenni boode mannu wolqanni harancho yanna giddo jawa looso loosa dandiissiisatenni sa’e; gidu hafanfarre gatisatenna gidu isilanchimmarano luphiima qeecha afidhinota ikkase egensiisino.
Gobbate gede jaante tungoonni sagaletenni umo dandaate ha’rinshora gibirinnu handaari qara ikkasi kaysanohu sooreessu; konnirano zoonete gede hala’lado baatto gidunni diwate kaajjine loonsanni afammannita lede qummeessino.
Tini yannaasincho tekinolooje noose horo kaiminni aantete zoonete giddo baalanka qooxeessa tuqisate loonsanni hee’noommo; kunino daga lowohunni horaameette assanno yiino kalaa Arbo.
Wole widoonni, gorsu loosinninna arri Qamadenni 14 kume 839 gishsha baatto laalchunni diwate mixi’ne loonsanni hee’noommo yiinohu Kalaa Arbo; konnira, hasiissanno qixxaawo gunde loosu giddora e’nanni hee’noonnita kulino.
Way jironni baraadhinoti Sidaami baattora daga way gatensaanni ha’ranna gutu’mite ita dinose yaanno uminni, gorsu loosinni mittu mittunku manchi qaamattotte laalo minisinni sae dikko shiqisha dandaanno loosi loosamanni nootano huwachishino.
Mootimma maatete Jireenya buuxisiisate gibirinnu laalchonna laalchimma lossate illachishshe loossanni afantannota daga seekkite huwatte baxxinohunni yannaasincho gibirinnu tekinolooje hayyo horonsidhe maatete Jireenya buuxisiisate harinsho rakkanno assate qeechansa fultanno gede sooreessu amadisiise sokkasi saysino.
Addisu Adoola
Bakkalcho Arfaasa 9, 2016 M.D
